አሜሪካ የዓለም ፈጣኑንና ትልቁን ኮምፒተር ይፋ አድርጋለች

አዲስ አበባ፣ ሰኔ5፣ 2010 (ኤፍ.ቢ.ሲ) አሜሪካ የዓለም ፈጣኑንና ትልቁን ኮምፒተር ይፋ ማድረጓ ተገልጿል።

በዘርፉ በቻይና ተይዞ የነበረውን ክብረ ወሰን በማሻሻል የዓለም ፈጣኑንና ትልቁን ኮንፒተር አገልግሎት ላይ ማዋሉን የአሜሪካው ዓለም አቀፍ የማሽን ንግድ ኮርፖረሽን ባሳለፍነው አርብ ይፋ ማድረጉ ተገልጿል።

 ሳሚት የሚል ስያሜ የተሰጠው ይኼው ፈጣኑና ትልቁ ኮምፒዩተር አሁን ላይ አሜሪካ ተንሴ ውስጥ ኦካክ ሪጅ ብሄራዊ ቤተሙከራ ውስጥ የሚገኝ ሲሆን፥ በሰከንድ 200 ሺህ ትሪሊየን የሂሳብ ስሌቶችን ለመስራት እንደሚያስችልም ታውቋል።

አዲሱ ቴክኖሎጂ ቀደም ሲል በአሜሪካ በትልቅነቱና በፍጥነቱ ከሚታወቀው ክሬይስ ቲታን በ8 እጥፍ እና አሁን ላይ ቻይና ውስጥ ታዋቂ ከሆነው ሰንወይ ታኢሁላይት ‘‘ሱፐር’’ ኮምፒዩተር በእጥፍ ያህል ፍጥነት ያለው መሆኑን ዘገባው ያስረዳል።

አዲሱ ሰሚት ‘‘ሱፐር’’ ኮምፒዩተር ማሽኖች የበራሂ መረጃዎችን ባህሪ ለማጥናት እና የህክምና መፍተሄዎችን ለማመላካት እንዲችሉ ለማድረግ የሚያስችል እንደሆነም ነው ዘገባው የሚያመላክተው።

በዚህም የመርሳትና የልብ በሽታዎችን እንዲሁም ሱስ የሚያስይዙ ንጥረ ቅመሞች በሰዎች ላይ የሚያደርሱትን የጤና ጉዳት መፍትሄ ለመስጠት የሚያስችሉ ስራዎችን የሚያግዝ ነው ተብሏል።

አዲሱ ቴክኖሎጂ የሰው ሰራሽ ‘‘ኢንተለጀንስ’’ ውጤቶችንም የተጠቀመ ሲሆን 200 ሚሊየን የአሜሪካ ዶላር ወጥቶበታል ነው የተባለው።

አሜሪካ ከዚህ ቀደም በፈረንጆቹ 2012 በዓለም አቀፍ ደረጃ ፈጣኑን ኮምፒዩተር አስተዋውቃ የነበረ መሆኑን ያስተወሰው ዘገባው ቀጣዩን ዓለም አቀፍ ‘‘ሳይንቲፍክና’’

ፈጣን ኮንፒዩተር የፊታችን ሰኔ 25 ይፋ እንደምታደርግ ነው የተገለጸው።

ምንጭ፦ foxbusiness.com

የተተረጎመውና የተጫነው፦ በእንቻለው ታደሰ