በመዲናዋ ከ2 ሺህ በሚበልጡ የንግድ ተቋማት ላይ እርምጃ ተወሰደ

አዲስ አበባ ፣ የካቲት 5 ፣ 2010 (ኤፍ ቢ ሲ) በመዲናዋ ከምግብና መጠጥ ጋር ባዕድ ነገሮችን በመቀላቀልና የመጠቀሚያ ጊዜ ያለፈባቸውን ምርቶች ሲሸጡ በተገኙ 2 ሺህ 316 የንግድ ተቋማት ላይ እርምጃ መውሰዱን የአዲስ አበባ የምግብ፣ መጠጥ፣ የጤና አስተዳደርና ቁጥጥር ባለስልጣን አስታወቀ፡፡

ተቋማቱ ከበርበሬ ጋር ቀይ አፈር፣ ከእንጀራ ጋር የእንጨት ተረፈ ምርት (ሰጋቱራ) እና ጀሶ፣ ከፈሳሽ ዘይት ጋር ፋጉሎ ቀላቅለው ሲሸጡ የተገኙ መሆናቸውንም ባለስልጣኑ ለኢዜአ በላከው መግለጫ አስታውቋል።

ባለስልጣኑ በበጀት ዓመቱ ታህሳስ እና ጥር ወራት ብቻ በመዲናዋ በሚገኙ 7 ሺህ 943 ተቋማት ላይ የተቀናጀ ቁጥጥር አካሂዶ 1 ሺህ 772ቱ ላይ እርምጃ መውሰዱንም ገልጿል፡፡

በባለስልጣኑ የቁጥጥር ንዑስ የስራ ሂደት ተወካይ አቶ አባዲ አብርሃ እንዳሉት፥ እርምጃ ከተወሰደባቸው ተቋማት መካከል 212ቱ ሲታሸጉ 534ቱ የፅሁፍ፣ 1 ሺህ 26ቱ ደግሞ የቃል ማስጠንቀቂያ ተሰጥቷቸዋል፡፡

የተቀናጀ ቁጥጥር ከተደረገባቸው 402 የምግብና መጠጥ አምራች ተቋማት ውስጥም 34ቱ የቃል፣ 37ቱ የፅሁፍ ማስጠንቀቂያ የተሰጣቸው ሲሆን 10ሩ መታሸጋቸውንም ተናግረዋል።

 

expired.jpg

በ2 ሺህ 213 ጤና ነክ አገልግሎት ሰጪ ተቋማት ላይ ቁጥጥር ተደርጎ 463ቱ ላይ ከቃል ማስጠንቀቂያ እስከ ማሸግ የደረሰ እርምጃ ተወስዷልም ነው ያሉት፡፡

ከባለስልጣኑ የተገኘው መረጃ እንሚያመላክተው በሁለት ወራት ውስጥ ከ14 ሺህ ኪሎ ግራም በላይ የተበላሸ ምግብ እና ከ11 ሺህ ሊትር በላይ የተበላሸ ምግብና መጠጥ ተወግዷል፡፡

ከ580 ሊትር በላይ ጤና ነክ ምርቶች እና ከ3 ሺህ 200 በላይ የተበላሹ ቁሳቁሶችም እንዲወገዱ ተደርገዋል።