በሁመራ በኩል ለውጭ ገበያ ከቀረበ የግብርና ምርት 65 ሚሊየን ዶላር ተገኘ

አዲስ አበባ፣ የካቲት 11፣ 2010 (ኤፍ.ቢ.ሲ) ባለፉት ስድስት ወራት በሁመራ በኩል ለውጭ ገበያ ከተላኩ የግብርና ምርቶች 65 ሚሊየን የአሜሪካ ዶላር ገቢ ተገኘ።

የሁመራ ጉምሩክ መቆጣጠሪያ ጽህፈት ቤት ኃላፊ ኮሎኔል ምሩጽ አብርሃ እንዳሉት፥ ገቢው የተገኘው በሱዳንና በጅቡቲ ወደብ ወደተለያዩ ሀገራት ተልኮ ለገበያ ከቀረበ ሰሊጥ፣ ቅመማ ቅመም፣ ጥራጥሬና የእንስሳት ተዋጽኦ ነው።

ምርቱ ወደ አውሮፓና እስያ ሃገራት መላኩን ገልጸው፣ ለውጭ ገበያ ከቀረበው የሰብል ምርት ውስጥ 509 ሺህ ኩንታል የሚሆነው ሰሊጥ መሆኑን ተናግረዋል።

እንደ ኮሌኔል ምሩጽ ገለጻ፥ በግማሽ ዓመቱ ለውጭ ገበያ ከቀረበው ምርት ሽያጭ የተገኘው ገቢ ካለፈው ዓመት ተመሳሳይ ወቅት ጋር ሲነጻጸር በ16 ነጥብ 4 ሚሊየን የአሜሪካ ዶላር ብልጫ አለው።

በኢትዮጵያና በሱዳን ድንበር አካባቢዎች በተፈጠሩ ህጋዊ የንግድ ትስስሮች ቀደም ሲል በስፋት ይታይ የነበረው የኮንትሮባንድ ህገ ወጥ ንግድ ከጊዜ ወደጊዜ እየቀነሰ መምጣቱ የተሻለ ገቢ እንዲገኝ አስተዋጾ ማድረጉን ተናግረዋል።

ምንጭ፦ ኢዜአ