ሆራይዘን አዲስ ጎማ 37 አዳዲስ የጎማ ምርቶችን በማምረት ለገበያ ማቅረብ ጀመረ

አዲስ አበባ፣ ግንቦት 4፣ 2010 (ኤፍ.ቢ.ሲ) ሆራይዘን አዲስ ጎማ አክስዮን ማህበር ከዚህ በፊት ከሚያመርታቸው የተሽከርካሪ ጎማዎች በተጨማሪ 37 አዳዲስ የጎማ ምርቶችን በማምረት ለገበያ ማቅረብ መጀመሩን አስታወቀ።

ምርቶቹ ለባለሶስት እግር ተሽከርካሪ፣ ትራክተር እና የከባድ ጭነት መኪኖችን ጨምሮ የየተለያዩ አይነት የጎማ ምርቶች ናቸው።

የኩባንያው የቦርድ ሊቀመንበር አቶ ጀማል አህመድ የምርቶቹን መመረቅ በይፋ ባሳወቁበት ወቅት፥ሀ ገሪቱ ከውጭ የምታስገባውን የጎማ ምርት መጠን በመቀነስ እና የውጭ ምንዛሬን ከማዳን አንጻር ኩባንያው ስፊ ስራዎችን እየሰራ ይገኛል ብለዋል ።

የኩባንያው ስራ አስኪያጅ አቶ አካለ ወልድ አድማሱ በበኩላቸው፥ ፋብሪካው አሁን ላይ ካለው 350 ሺህ አመታዊ የማምረት አቅም ወደ 650 ሺህ ከማሳደግ በተጨማሪ ከ25 በመቶ ሀገራዊ የገበያ ድርሻ 60 በመቶ ለማሳደግ በመስራት ላይ እንደሚገኝ አስታውቀዋል።

አለም አቀፍ የጥራት መስፈርቶችን ያሟሉ ምርቶችን ለገበያ ለማቅረብ በምንሰራው ስራ ውስጥ ዛሬ ያስመረቅናቸው አዳዲስ ምርቶች የዚህ ማሳያ ናቸው ብለዋል።
ሆራይዘን አዲስ ጎማ ያሁኑን ስያሜውን ከማግኘቱ በፊት ማታዶር አዲስ ጎማ በሚል ስያሜ ነበር የሚታወቀው።

በ2003 ዓ.ም የሜድሮክ ኢትዮጵያ ኢንቨስትመንት ግሩፕን ከተቀላቀለ በኋላ የአሁኖቹን አዳዲስ ምርቶች ጨምሮ የተሻሻሉ ምርቶቹን ለገበያ በማቅረብ ላይ ይገኛል።

በአሸብር ካሳሁን