ኢትዮ ቴሌኮም ወደ ኤርትራ ስልክ ለመደወል የሚያስፈልገውን ዝርዝር መረጃ ይፋ አደረገ

አዲስ አበባ፣ ሃምሌ፣3፣ 2010 (ኤፍ.ቢ.ሲ) ኢትዮ ቴሌኮም ወደ ኤርትራ ወደ መደበኛና የሞባይል ስልክ ለመደወል የሚያስችለውን ዝርዝር መረጃ ይፋ አደረገ።

የኢትዮ ቴሌኮም ለፋና ብሮድካስቲንግ ኮርፖሬት እንዳስታወቀው ደንበኞች ወደ ኤርትራ የመደበኛና ሞባይል ስልኮች ሲደውሉ ታሪፉ ቫትን ጨምሮ ለአንድ ደቂቃ 10 ብር ከ29 ሳንቲም ነው።

ኩባንያው እንዳስታወቀው ወደ ኤርትራ መደበኛ ስልክ ለመደወል +291 1 እና ለሞባይል ስልክ ደግሞ +291 7 በማስቀደም የሚደወልለትን ስልክ ቁጥር በማስገባት አገልግሎቱን ማግኘት እንደሚቻል ገልጿል። 

በአሁን ወቅት የተቋሙ ደንበኞ ወደ ኤርትራ መደበኛና የሞባይል ስልክ መደወል እንደሚችሉም ነው ያስታወቀው።

ከኤርትራ ጋር የነበረው የስልክ ግንኙነት ከ1990 ዓ.ም ጀምሮ ተቋርጦ እንደቆየ የተገለፀ ሲሆን፥ ከ20 ዓመታት በኋላ ጠቅላይ ሚኒስትር ዶክተር አብይ አህመድ በኤርትራ ያደረጉትን ጉብኝት ተከትሎ አገልግሎቱ በድጋሚ ተጀምሯል።