ፋሲል ከነማ ቅጣት ተላለፈበት

አዲስ አበባ፣ መጋቢት 9፣ 2009 (ኤፍ.ቢ.ሲ) ፋሲል ከነማ አንድ ጨዋታ በሜዳው እንዳይጫወት ቅጣት ተላለፈበት።

በ18ኛው ሳምንት የኢትዮጵያ ፕሪምየር ሊግ ባለፈው እሁድ ኢትዮጵያ ቡናን አስተናግዶ 4ለ1 በሆነ ውጤት የተሸነፈው ፋሲል ከነማ አንዳንድ ደጋፊዎቹ በጨዋታው ባሳዩት ያልተገባ ተግባር አንድ ጨዋታ ከሜዳው ውጪ እንዲያደርግ ቅጣት ተላልፎበታል።

በጨዋታው ላይ የፋሲል ከነማ አንዳንድ ደጋፊዎች የዳኛን ውሳኔ በመቃወም በተፈጠሩት ግርግር ጨዋታው 36 ደቂቃ ያህል መቋረጡ ይታወሳል።

ይህንን ተከትሎ የዲሲፒሊን ኮሚቴ ትናንት ማታ ስብሰባ አድርጎ በወሰነው ውሳኔ መሰረት ፋሲል ከነማ አንድ የፕሪምየር ሊግ ጨዋታ ከሜዳው ውጭ 500 ኪሎ ሜትር ርቆ የሚጫወት ይሆናል።

በቀጣይ መጋቢት 20 ቀን 2009 በሜዳው ከወልድያ ጋር ሊያደርገ የነበረውን ጨዋታ በገለልተኛ ሜዳ እንዲያደርግ የተወሰነ ሲሆን፥ ጨዋታው የት ቦታ እንደሚሆን ወደ ፊት እንደሚገለጽ ተነግሯል።

ፋሲል ከነማ ሁለተኛው ዙር ከተጀመረ ወዲህ ባደረጋቸው ሶስት ጨዋታዎች ሁሉንም የተሸነፈ ሲሆን፥ ከነዚህ መካከል ሁለቱ በሜዳው ነው የተረታው።

ምንጭ፦ www.soccerethiopia.net