ፕሪሚየር ሊጉ የሚጀመርበት ቀን ታወቀ

አዲስ አበባ፣ ሀምሌ 10፣ 2009 (ኤፍ.ቢ.ሲ) የኢትዮጵያ ፕሪሚየር ሊግ የ2010 የውድድር ዘመን ጥቅምት 4 ቀን 2010 እንደሚጀመር ተገለፀ።

የኢትዮጵያ እግርኳስ ፌዴሬሽን ባለፉት አመታት ሊጉ የሚጀመርበትን ቀን ዘግይቶ የማሳወቅ ልምድ የነበረው ሲሆን ክለቦችም ቀድሞ መርሀ ግብሩ የሚጀመርበት ቀን እንዲነገራቸው በተለያዩ ጊዜያት ሲጠይቁ ይስተዋላል።

ፌዴሬሽኑም በዚህ ምክንያት የውድድሩን መጀመርያ ቀን እንደቆረጠ ነው ሶከር ኢትዮጵያ የዘገበው።

ሊጉ በተለያዩ አስገዳጅ ምክንያቶች ካልተራዘመ በቀር ጥቅምት 4 እንዲጀመር የወሰነ ሲሆን በመስከረም ወር ደግሞ የ2009 የውድድር ዘመን አፈጻጸም ሪፖርት እና የእጣ ማውጣት ይደረጋል፡፡

የእጣ ማውጣቱ ጥያቄ እንዳያስነሳ በሚልም ከዚህ ቀደም ከነበረው የተለየ የአካሄድ ለውጥ እንደሚኖር ታውቋል፡፡

ከአዲሱ የውድድር ዘመን የኢትዮጵያ ፕሪሚየር ሊግ መጀመር አንድ ሳምንት ቀደም ብሎ መስከረም 25 እና 28 በአሸናፊዎች አሸናፊ ዋንጫ ቅዱስ ጊዮርጊስ ከወላይታ ድቻ የሚጫወቱ ይሆናል።