ኢትዮጵያ በሴካፋ ዋንጫ ደቡብ ሱዳንን አሸነፈች

አዲስ አበባ፣ ህዳር 26፣ 2010 (ኤፍ ቢ ሲ) በኬንያ አስተናጋጅነት እየተካሄደ በሚገኘው የ2017 የምስራቅና መካከለኛው አፍሪካ ዋንጫ (ሴካፋ) የኢትዮጵያ ብሄራዊ ቡድን የደቡብ ሱዳን አቻውን 3 ለ 0 በሆነ ውጤት አሸንፏል።

ምድብ ሁለት ላይ የሚገኙት የሁለቱ ቡድኖች የመጀመሪያ ጨዋታ ከቀኑ ዘጠኝ ሰዓት ጀምሮ በቡክሁንጉ ስታዲየም ተደርጓል።

ለዋልያዎቹ ሁለቱን ግቦች አቤል ያለው ሲያስቆጥር ቀሪዋን ግብ አቡበከር ሳኒ ከመረብ አዋህዷል።

በተመሳሳይ ምድብ ኡጋንዳ እና ቡሩንዲ ትናንት ጨዋታቸውን ባዶ ለባዶ በማጠናቀቅ ነጥብ ተጋርተው መውጣታቸው ይታወቃል።

የኢትዮጵያ ብሄራዊ ቡድን የዛሬውን ጨዋታ ማሸነፉን ተከትሎ ምድቡን በሶስት ነጥብ እየመራ ነው።

ኡጋንዳ እና ቡሩንዲ በተመሳሳይ አንድ ነጥብ ሁለተኛ እና ሶስተኛ ደረጃን ሲይዙ፥ ደቡብ ሱዳን ያለምንም ነጥብ አራተኛ ላይ ተቀምጣለች።

ዋልያዎቹ በመጪው ሀሙስ ከቡሩንዲ እና እሁድ ከኡጋንዳ ጋር ጨዋታቸውን ያደርጋሉ።

በሴካፋ ዋንጫ ዛሬ በተደረገ የምድብ አንድ ጨዋታ ዛንዚባር ሩዋንዳን 3 ለ 1 በሆነ ውጤት አሸንፋለች።

ምንጭ፦kenyayote.com