በካፍ ቻምፒየንስ ሊግ ቅዱስ ጊዮርጊስ በፎርፌ ወደ ቀጣዩ ዙር አለፈ

አዲስ አበባ ፣ የካቲት 4 ፣ 2010 (ኤፍ ቢ ሲ) የቅዱስ ጊዮርጊስ እግር ኳስ ክለብ በካፍ ቶታል ቻምፒየንስ ሊግ ቅድመ ማጣሪያ ጨዋታ ወደ ቀጣዩ ዙር አለፈ።

ፈረሰኞቹ ዛሬ በ10 ሰዓት ከደቡብ ሱዳኑ አል ሰላም ዋኡ ክለብ ጋር በአዲስ አበባ ስታዲየም ጨዋታቸውን ለማድረግ መርሃ ግብር ተይዞላቸው ነበር።

ይሁን እንጅ የደቡብ ሱዳኑ ክለብ ለጨዋታ በስፍራው ባለመገኘቱ፥ ቅዱስ ጊዮርጊስ በፎርፌ ወደ ቀጣዩ ዙር ማለፉን አረጋግጧል።

የቅዱስ ጊዮርጊስ ተጫዋቾችም የካፍ ህግ በሚያዘው መሰረት ወደ ሜዳ ገብተው 15 ያህል ደቂቃዎች ልምምድ በማድረግ ተጋጣሚያቸውን ጠብቀዋል።

የጨዋታው ኮሚሽነርና ዳኞቹም ከ15 ደቂቃ በኋላ ጨዋታው እንዲጠናቀቅ አድርገዋል።

ከዚህ ባለፈም ከጉዳዩ ጋር በተያያዘ የገንዘብ ቅጣትና እገዳ ሊጣልበት ይችላል።

የዩጋንዳው ኬ ሲ ሲ ኤ እና የማዳጋስካሩ ስናፕስ ስፖርት አሸናፊ የፈረሰኞቹ ቀጣይ ተጋጣሚ ይሆናሉ።

በሌላ ዜና በካፍ ኮንፌዴሬሽን ዋንጫ ኢትዮጵያን የወከለው ወላይታ ድቻ ዛንዚባር ላይ ከዛንዚባሩ ክለብ ዚማሞቶ ጋር ዛሬ ጨዋታውን አድርጓል።

ጨዋታው አንድ አቻ የተጠናቀቀ ሲሆን፥ የመልስ ጨዋታውንም አዲስ አበባ ላይ ያደርጋል።