በጎንደር በመዝናኛ ስፍራ ላይ የተወረወረ ቦንብ የአንድ ሰው ህይወት አጠፋ

አዲስ አበባ፣ ጥር 3፣ 2009 (ኤፍ.ቢ.ሲ) በጎንደር ከተማ ትናንት ምሽት 12 ሰዓት በመዝናኛ ስፍራ ላይ የተወረወረ ቦምብ የአንድ ሰው ህይወት ማጥፋቱ ተነገረ።

በከተማዋ ማራኪ ክፍለ ከተማ በተለምዶ ቀበሌ 18 ተብሎ በሚጠራ አካባቢ ላይ በሚገኝ ኢንታሶል በተባለ ሆቴል ላይ ከውጭ የተወረወረው ቦምብ በሌሎች 18 ሰዎች ላይ ቀላል እና ከባድ የመቁሰል አደጋ አድርሷል።

ጉዳት የደረሰባቸው ሰዎች በጎንደር ሪፈራል ሆስፒታል የህክምና እርዳታ እየተደረገላቸው ነው።

የጎንደር ከተማ አስተዳደር የፖሊስ መምሪያ ሃላፊ ኮማንደር አሰፋ አሸቤ ለፋና ብሮድካስቲንግ ኮርፖሬት እንደተናገሩት፥ ፖሊስ አደጋ አድራሾቹን ለመያዝ ክትትል እያደረገ ይገኛል።

"በአከባቢው ፀረ ሰላም ሀይሎች ከዚህ በፊት ሲከተሉት የነበረው መንገድ ስላላዋጣቸው የጀመሩት አዲስ ስልት ሊሆን ይችላል" ነው ያሉት የመምሪያ ሃላፊው።

ፖሊስ የነዋሪዎችን ደህንነት ለመጠበቅ ከህብረተሰቡ ጋር በጋራ ክትትሉን እና ጥበቃውን አጠናክሮ እንደሚቀጥልም አመልክተዋል።

ህዝብ የሚገለገልባቸው ተቋማት የፍተሻ እና  የክትትል ስራቸውን እንዲያጠናክሩ ነው ያሳሰቡት።

ህብረተሰቡ አጠራጣሪ ነገሮችን ሲመለከት ለፖሊስ እንዲያሳውቅም ጠይቀዋል።

 

በነብዩ ዮሃንስ