ኢሶዴፓ ፕሮፌሰር በየነ ጴጥሮስን ሊቀመንበር አድርጎ መረጠ

አዲስ አበባ፣ ሀምሌ 10፣ 2009 (ኤፍ.ቢ.ሲ) የኢትዮጵያ ማህበረ ዴሞክራሲና ደቡብ ህብረት አንድነት ፓርቲ ስያሜውን ወደ ኢትዮጵያ ሶሻል ዴሞክራሲ ፓርቲ /ኢሶዴፓ/ መቀየሩን አስታወቀ።

የኢትዮጵያ ማህበረ ዴሞክራሲ ፓርቲና ደቡብ ኢትዮጵያ ህዝቦች ዴሞክራሲያዊ ሕብረት ውህደት በኋላ ፓርቲው ብሔራዊ ምርጫ ቦርድ በታዛቢነት በተገኘበት የመጀመሪያ ጠቅላላ ጉባኤውን ትናንት አካሂዷል።

በጉባኤውም ፓርቲው ፕሮፌሰር በየነ ጴጥሮስን በሊቀ መንበርነት፣ አቶ ጥላሁን እንዳሻውን በምክትል ሊቀመንበርነት፣ ምሳ አለቃ በቀለ ጌዴቦን የኦዲትና ኢንስፔክሽን ሃላፊ በማድረግ መርጧል።

በተጨሪም 31 የፓርቲው ማዕከላዊ ኮሚቴና አምስት ተለዋጭ አባላት ምርጫን ሲያካሂድ ከ31 ማዕከላዊ ኮሚቴ አባላቱ ውስጥ 11ዱን በስራ አስፈፃሚነት መርጧል።

የፓርቲው ሊቀመንበር ፕሮፌሰር በየነ የፓርቲውን ርዕዮተ ዓለም ለማሳደግ፣ የመጠሪያ ስሙን ለማቅለል፣ በደቡብ ተወላጆች ብቻ የታጠረውን የፓርቲውን ተደራሽነት በክልሉና ከክልሉ ውጭ ለማድረግ የስም ለውጥ ማስፈለጉን ተናግረዋል።

ኢሶዴፓ ከካፒታሊዝምና ሶሻሊዝም ርዕዮተ ዓለማት የወሰዳቸው ለኢትዮጵያ ህዝብ መልካም ናቸው የሚላቸውን ጠንካራ ጎኖች የያዘ ሶሻል ዴሞክራሲ እንደሚከተልም ነው የገለጹት።

የፓርቲው አመራርና አባላት ሰላማዊና ዴሞክራሲያዊ ትግል በማድረግ ለኢትዮጵያ ህዝብ ተጠቃሚነትና መብት መረጋገጥ እንደሚሰሩም ሊቀ መንበሩ ቃል ገብተዋል።

ፓርቲው ኢትዮጵያን እርስ በእርስ ለማተረማመስና ዲሞክራሲያዊ ባልሆነ መንገድ ስልጣን ለመያዝ ከሚፈልጉ ፅንፈኛ ሃይሎች ጋር እንደማይሰራ መናገራቸውንም ኢዜአ ዘግቧል።