የሰሜን ኮሪያ የመረጃ ጠላፊዎች የአሜሪካና የደቡብ ኮሪያን የጦርነት እቅዶች በእጃቸው አስገቡ

አዲስ አበባ፣ መስከረም 30፣ 2010 (ኤፍ ቢ ሲ) የሰሜን ኮሪያ የመረጃ ጠላፊዎች የአሜሪካ እና የደቡብ ኮሪያን የጦርነት እቅዶች በእጃቸው አስገቡ።

መረጃ ጠላፊዎቹ የመነተፏቸው በርካታ የጦርነት እቅድ የያዙ ሰነዶች የሰሜን ኮሪያውን መሪ ኪም ጆንግ ኡንን ለመግደል የታሰበውን እቅድ ጭምር ያካተቱ ናቸው።

የደቡብ ኮሪያ የህግ አውጭ ምክር ቤት አባል ረሄ ቼኦል ሄ እንድተናገሩት፥ መረጃው በሀገራቸው የመከላከያ ሚኒስቴር ስር ነበር።

ሰነዶቹ በዋሽንግተን እና በሴኡል የተነደፉ የጦርነት ጊዜ ተጠባባቂ እቅዶችን የያዙ መሆናቸው ተነግሯል።

ስለ ሀገራቱ የጦር አዛዦች ጥምረት የሚገልፁ መረጃዎችም መኖራቸው ተመላክቷል።

የጦርነት እቅድ ሰነዶቹ በሰሜን ኮሪያ የመረጃ ጠላፊዎች እጅ ስለመግባታቸው የደቡብ ኮሪያ የመከላከያ ሚኒስቴር አስተያየት ከመስጠት ተቆጥቧል።

ስለ ሀገሪቱ ልዩ ሃይሎች እርምጃ የተቀመጡ አቅጣጫዎች፣ የሃይል ፕሮጀክቶችን እና በደቡባዊ ክፍል ስለሚገኙ የጦር መሳሪያዎች የሚገልፁ መረጃዎችም አፈትልከዋል።

በደቡብ ኮሪያ የምክር ቤት የገዥው ፓርቲ አባል የሆኑት ሚስተር ሄ በመከላከያ ቋሚ ኮሚቴ አባል ናቸው።

እኝህ ሰው በመረጃ ጠለፋው 235 ጊጋ ባይት የወታደራዊ ሰነዶች ከሀገሪቱ የተቀናጀ የመከላከያ የመረጃ ማዕከል መሰረቃቸውን ነው የተናገሩት።
ከተሰረቁት ውስጥ 80 በመቶዎቹ መለየታቸውን ጠቁመዋል።

የመረጃ ጠለፋው የተደረገው ባለፈው የፈረንጆቹ ዓመት መስከረም ወር ላይ ሲሆን፥ በግንቦት ወር ደግሞ ደቡብ ኮሪያ በርካታ መረጃ እንደተጠለፈባት ገልፃ፥ ሰሜን ኮሪያ ጥቃቱን አድርሳ ሊሆን ይችላል ማለቷ ይታወቃል።

ዮንሃፕ የተባለው የሴኡል የዜና አውታር ባወጣው መረጃ ጎረቤት ሰሜን ኮሪያ ተደጋጋሚ የመረጃ መረብ ጥቃቶችን አድርሳለች ብሏል።

በተለይም የመንግስት ድርገፆች እና ንብረት ላይ ያነጣጠረ የመረጃ መረብ ጥቃት ሳትፈፅም እንዳልቀረች ነው የተጠቀሰው።

በምታስወነጭፋቸው ሚሳኤሎች እና በኒዩክሌር ጦር መሳሪያ መርሃ ግብሯ ምክንያት በፀጥታው ምክር ቤት ጠንካራ ማዕቀብ የተጣለባት ሰሜን ኮሪያ፥ መቀመጫቸውን ከሀገሪቱ ውጭ ያደረጉ በልዩ ሁኔታ የሰለጠኑ የመረጃ መረብ ጠላፊዎች እንዳሏት ተነግሯል።

የመረጃ ጠላፊዎቿ መቀመጫ ቻይናን እንደሚጨምር ተጠቁሟል።

ሆኖም ፒዮንግያንግ ይህን ውንጀላ ሀሰት ነው ትላለች።

ምንጭ፦ቢቢሲ