ሳዑዲ አረቢያ፣ የተባበሩት አረብ ኢሚሬትስና ኩዌት ዜጎቻቸው ሊባኖስን ለቀው እንዲወጡ አሳሰቡ

አዲስ አበባ፣ ህዳር 1፣ 2010 (ኤፍ.ቢ.ሲ) ሳዑዲ አረቢያ፣ የተባበሩት አረብ ኢሚሬትስ እና ኩዌት ዜጎቻቸው ወደ ሊባኖስ እንዳይዟዙ አሳስበዋል።

በሀገሪቱ የሚገኙ ዜጎቻቸውም በፍጥነት ሀገሪቱን ለቀው እንዲወጡም ጥሪ አቅርበውላቸዋል።

ኤስ ፒ ኤ የተባለው የዜና አውታር የሳዑዲን የውጭ ጉዳይ ሚኒስቴር ጠቅሶ እንደዘገበው፥ በሊባኖስ ውስጥ ባለው አስጊ ሁኔታ የተነሳ የሳዑዲ ዜጎች ለጉብኝትም የሄዱትም ይሁን መኖሪያቸውን በሀገሪቱ ያደረጉ የሳዑዲ ዜጎች በፍጥነት እንዲወጡ ተጠይቀዋል።

እንዲሁም ሁሉም የሳዑዲ አረቢያ ዜጎች ከየትኛውም የዓለም ክፍል ወደ ሊባኖስ ጉዞ እንዳያደርጉም የሳዑዲ ንጉሳዊ አስተዳደር መክሯል።

ከሰዓታት በኋላም ኩዌት እና የተባበሩት አረብ ኢሚሬትስም ዜጎቻቸው ሊባኖስን በአስቸኳይ ለቀው እንዲወጡ አሳስበዋል።

የሳዑዲ አረቢያ ተባባሪ የሆነችው ባህሬንም ከሁሉም ቀደም በማለት ባሳለፍነው እሁድ ዜጎቿ ሊባኖስን ለቀው እንዲወጡ ማሳሰቧ ነው የተነገረው።

የሊባኖሱ ጠቅላይ ሚኒስትር ሳድ አልሀሪሪ በሳዑዲ አረቢያ ጉብኝት በማድረግ እያሉ በድንገት ስልጣናቸውን እንደሚለቁ ማሳወቃቸውን ተከትሎ ሀገሪቱ ከፍተኛ ውጥረት ወስጥ ገብታለች።

ጠቅላይ ሚኒስትሩ አሁን ያሉበት ቦታ በግልፅ አይታወቀም እየተባለ ሲሆን፥ ሳኡዲ አረቢያ ሳታስገድዳቸው እየቀርም የሚሉ መረጃዎችም ወጥተዋል።

የሀገሪቱ ባለስልጣናትም ሀሪሪ በሳዑዲ አረቢያ በቁም እስር ላይ ሳይሆኑ አይቀሩም እያሉ ነው።

በጠቅላይ ሚኒስትሩ የሚመራው የሊባኖስ ፊውቸር ሙቭመንት ፓርቲ በበኩሉ በትናንትናው እለት ባወጣው መግለጫው ጠቅላይ ሚኒስትሩ ወደ ሀገራቸው ተመልሰዋል ብሏል።

የሊባኖስ መንግስት እስካሁን የጠቅላይ ሚኒስትሩን የመልቀቂያ ጥያቄ አለመቀበሉን እና አሁንም ሳድ አልሀሪሪ የሀገሪቱ ጠቅላይ ሚኒስትር ናቸው እንደሚል የሀገሪቱ ከፍተኛ ባለስልጣናት ተናግረዋል።

ባለስልጣናቱ አክለውም ሳዑዲ አረቢያ ጠቅላይ ሚኒስትሩ ላይ የጣለችው ገደብ በሊባኖስ መሪዎች ላይ ጥቃት እንደፈፀመች ይወሰዳል ብለዋል።

ሪያድ በበኩሏ ጠቅላይ ሚኒስትር ሳድ አልሀሪሪ በሳዑዲ አረቢያ በቁም እስር ላይ ይገኛሉ በሚል የቀረበባትን ውንጀላ አጣጥላለች።

ሳዑዲ አረቢያ፣ የተባበሩት አረብ ኢሚሬትስ እና ኩዌት ዜጎቻቸው ሊባኖስን ለቀው እንዲወጡ ያሳሰቡንም በሊባኖስ የሚንቀሳቀሰው ሄዝቦላህ እና ሳዑዲ ፍጥጫ ውስጥ መግባታቸወን ተከትሎ ነው ተብሏል።

ምንጭ፦ www.aljazeera.com