በሳይንስ፣ ቴክኖሎጂና ኢኖቬሽን ሳምንት 144 ግለሰቦችና አንድ ተቋም እውቅናና ሽልማት ያገኛሉ

አዲስ አበባ፣ ህዳር 2፣ 2010 (ኤፍ.ቢ.ሲ) በዘንድሮው ብሔራዊ የሳይንስ፣ ቴክኖሎጂ እና ኢኖቬሽን ሳምንት 144 ግለሰቦች እና አንድ ተቋም እውቅና እና ሽልማት እንደሚሰጣቸው ተገለጸ።

በብሔራዊ የሳይንስ፣ የቴክኖሎጂ እና ኢኖቬሽን ሳምንት ከሚሸለሙት መካከል 106ቱ ወንዶች ሲሆኑ፥ 38ቱ ሴቶች ናቸው፡፡

ከነዚህ መካከል አምስቱ በፈጠራ እና ምርምር፣ 140ዎቹ በአጠቃላይ ትምህርት ከትምህርትና ስልጠና ተቋማት እና ከዩኒቨርሲቲዎች የተመረጡ ተማሪዎችና መምህራን ናቸው።
ሦስተኛው የሳይንስ፣ ቴክኖሎጂ እና ኢኖቬሽን ሳምንትም ህዳር 4 ቀን 2010 ዓ.ም በአዲስ አበባ ይከበራል።

ለሦስተኛ ጊዜ የሚከናወነው የሳይንስ፣ ቴክኖሎጂ እና ኢኖቬሽን ሳምንት በሳይንስ እና ቴክኖሎጂ ሚኒስቴር ግቢ ውስጥ በዓውደ ርዕይ እና በፓናል ውይይት ነው የሚከበረው።።

የሳይንስና ቴክኖሎጂ ሚኒስትሩ ዶክተር ኢንጂነር ጌታሁን መኩሪያ በሰጡት ጋዜጣዊ መግለጫ እንደገለጹት፥ አውደ ርዕዩ ለወጣቶች፣ ለተመራማሪዎች፣ የቴክኖሎጂ ባለሙያዎች እና ለሁሉም የህብረተሰብ ክፍል ለአንድ ሳምንት ክፍት ሆኖ ይቆያል።

የሳይንስ እና ቴክኖሎጂ ሚኒስቴር ከአዲስ አበባ ከተማ አስተዳደር ወጣቶች ቢሮ ጋር በመተባበር ያስገነባቸው እና ወጣቶች የቴክኖሎጂ እውቀት እንዲቀስሙ የሚያስችሉ አምስት የ"ሳይንስ ካፌዎች" በምክትል ጠቅላይ ሚኒስትር አቶ ደመቀ መኮንን እንደሚመረቁ ሚኒስትሩ ዶክተር ኢንጂነር ጌታሁን ተናግረዋል።

እንዲሁም ህዳር 9 ቀን 2010 ዓ.ም በሚደረገው የመዝጊያ ስነ ስርአት ጠቅላይ ሚኒስትር ኃይለማርያም ደሳለኝ በስምንተኛው ብሔራዊ የሳይንስ፣ ቴክኖሎጂ እና ኢኖቬሽን ዘርፍ ጉልህ አስተፅዖ ላደረጉ ግለሰቦች እና ተቋማት ሽልማት እና እውቅና እንደሚሰጡ ዶክተር ኢንጂነር ጌታሁን መኩሪያ አሳውቀዋል።

ከ2002 ዓ.ም እስካለፈው ዓመት ድረስ ለ1 ሺ 456 ግለሰቦችና ተቋማት እውቅና እና ሽልማት መሰጠቱን ከሚኒስቴሩ የተገኘ መረጃ እንደሚያሳይ ኢዜአ በዘገባው አስፍሯል።