በመዲናዋ 74 ነጥብ 9 በመቶዎቹ የትምህርት ተቋማት ከደረጃ በታች ሆነዋል

አዲስ አበባ ፣ ህዳር 20 ፣ 2010 (ኤፍ ቢ ሲ) በአዲስ አበባ ከተማ ከቅድመ መደበኛ ጀምሮ እስከ መሰናዶ ባሉ የትምህርት ተቋማት ላይ በተደረገ ምዘና 74 ነጥብ 9 በመቶዎቹ ከተቀመጠላቸው ደረጃ እና መስፈርት በታች መሆናቸው ተረጋገጠ።

የአጠቃላይ ትምህርት ጥራትና አግባብነት ሬጉላቶሪ ኤጀንሲ በምዘና ውጤቱ ላይ ከመምህራን እና ከትምህርት ተቋማት አመራሮች ጋር እየተወያየ ሲሆን፥ በ2009 ዓ.ም ያካሄደውን የቁጥጥርና ክትትል ስራ ግኝትም ይፋ አድርጓል።

በመዲናዋም ከቅድመ መደበኛ እስከ መሰናዶ በሚገኙ 1 ሺህ 612 የትምህርት ተቋማት ላይ ከመምህራን አቅም ጀምሮ በመማሪያ ቁሳቁስና በሌሎችም ዘርፎች ምዘና ተደርጓል።

በዚህም 25 ነጥብ 1 የትምህርት ተቋማት በሚፈለገው ደረጃ ላይ ሲገኙ፥ ቀሪዎቹ 74 ነጥብ 9 በመቶ ከደረጃ በታች መሆናቸው ተረጋግጧል ነው የተባለው።

ይህም በሃገሪቱ የመማር ማስተማር ሂደቱን ውጤታማ ለማድረግ እየተተገበረ ያለው የትምህርት ጥራት ደረጃ በሚፈለገው መጠን ውጤታማ አለመሆኑን አመላካች ነው ተብሏል።

በሃገሪቱ ከ1ኛ እስከ 4ኛ የትምህርት ጥራት ደረጃ ተለይቶ የመማር ማስተማር ሂደቱን የተሻለ ለማድረግ እየተሰራበት ይገኛል።

እንደ ሃገርም ሁሉም የትምህርት ተቋማት 3ኛ ደረጃ ላይ እንዲገኙ ቢፈለግም የተገኘው ውጤት ግን ከዚህ ተቃራኒ መሆኑን በውይይቱ ወቅት ተገልጿል።

የኤጀንሲው ዋና ዳይሬክተር ወይዘሪት ብሩክነሽ አራጋው እንዳሉት፥ በዝቅተኛ ደረጃ ላይ የሚገኙ የትምህርት ተቋማትን አቅም ለማሳደግ ድጋፍ እየተደረገላቸው ነው።

ከዚህ ባለፈ ግን ድጋፍ ተደርጎላቸው መሻሻል ባልቻሉ ተቋማት ላይ ከማስጠንቀቂያ ጀምሮ ፍቃድ እከመንጠቅና ትምህርት ቤቱን እስመዝጋት የደረሰ እርምጃ እየተወሰደባቸው መሆኑንም ተናግረዋል።

መሰል ውይይቶች የተቋማቱን አቅም ለማሳደግ ይረዳሉም ነው ያሉት ዋና ዳይሬክተሯ።

 

 

 

በሰለሞን ጥበበስላሴ