በአቃቤ ህግ ጉዳያቸው ተይዞ በእስር የሚገኙ የተፈረደባቸው የተለያዩ ግለሰቦች እንዲለቀቁ ተወስኗል- ጠ/ሚ ኃይለማርያም

አዲስ አበባ፣ ታህሳስ 25፣ 2010 (ኤፍ ቢ ሲ) የአራቱ የኢህአዴግ ብሔራዊ ድርጅቶች ሊቀመንበሮች በወቅታዊ ሀገራዊና ክልላዊ ጉዳዮች ላይ በጋራ ጋዜጣዊ መግለጫ ሰጥተዋል።

በመግለጫው ላይ የኢህአዴግ ሊቀመንበር እና የኢፌዴሪ ጠቅላይ ሚኒስተር ኃይለማርያም ደሳለኝ “የህዝባችንና የወዳጆቻችንን ስጋት እየቀረፍን የጠላቶቻችን ከንቱ ምኞት፣ ድባቅ እየመታን ለዚሁ በቅተናል። ለውድቀት የታጨን አይደለንምና ለጊዜው ባጋጠመን ተግዳሮች ውስጥ እንኳ ብናልፍ በአሸናፊነት እንወጣለን።” ብለዋል።

"በፈፀሙት ወንጀል ምክንያት በፍርድ ቤት የተፈረደባቸው ወይም ደግሞ በአቃቤ ህግ ጉዳያቸው ተይዞ በእስር የሚገኙ አንዳንድ ግለሰቦችን የተሻለ ሃገራዊ መግባባት ለመፍጠርና የዲሞክራሲ ምህዳሩን ለማስፋት በማሰብ ክሳቸው ተቋርጦ ወይም በይቅርታ እንዲለቀቁ ተወስነኗል::" ነው ያሉት።

ክሳቸው የሚቋረጠው ወይም በይቅርታ የሚፈቱትም በምህረት ህግና ህገመንግሥቱ በሚፈቅደው መልኩ ተገቢው ማጣራት ተደርጎ እንደሆነም ነው ያመለከቱት።

በደርግ ዘመን በምርመራ ስም ልዩ የጭካኔ ተግባር ሲፈጸምበት የነበረውና በተለምዶ ማዕከላዊ በመባል የሚታወቀው የምርመራ ማእከል እንዲዘጋ ተደርጎ ሙዝየም እንዲሆን እንደተወሰነ አቶ ኃይለማርያም ተናግረዋል

በምትኩ በዓለም አቀፍ ደረጃ እና የህዝብ ተወካዮች ምክር ቤት ባፀደቀው የሰብአዊ መብት ድርጊት መርሃ ግብር መሰረት አዲስ የምርመራ ተቋም ተቋቁሞ በሌላ ህንፃ ስራ መጀመሩም በመግለጫው ላይ አስታውቀዋል።

መግለጫውን የኢህአዴግ እና ደኢህዴን ሊቀመንበር አቶ ኃይለማርያም ደሳለኝን ጨምሮ የኢህአዴግ ምክትል ሊቀመንበር እና የብአዴን ሊቀመንበር አቶ ደመቀ መኮንን፣ የኦህዴድ ሊቀመንበር አቶ ለማ መገርሳ እና የህወሃት ሊቀመንበር ዶክተር ደብረፅዮን ገብረሚካኤል ናቸው በጋራ የሰጡት።