በኦህዴድ ማዕከላዊ ኮሚቴ ባስቀመጠው አቅጣጫ መሰረት መንግስት እንዲሰራ ህዝቡ ጊዜ ሊሰጥ ይገባል- የክልሉ መንግስት

አዲስ አበባ፣ የካቲት 6፣ 2010 (ኤፍ.ቢ.ሲ) የኦህዴድ ማዕከላዊ ኮሚቴ ባወጣው መግለጫ መሠረት የተቀመጡ አቅጣጫዎችን መንግስት እንዲሰራ ህዝቡ ጊዜ ሊሰጥ ይገባል አለ የኦሮሚያ ክልል መንግስት ኮሙዩኒኬሽን ጉዳዮች ቢሮ።

የክልሉ መንግስት ኮሙዩኒኬሽን ጉዳዮች ቢሮ ምክትል ኃላፊ ወይዘሮ ኡሚ አባጀማል በኦሮሚያ ክልል አንዳንድ አካባቢዎች የተፈጠረውን የንግድ እንቅስቃሴ ማቆምና የመንገድ መዝጋት እንዲሁም የደረሰውን ጉዳት አስመልክቶ ዛሬ ጋዜጣዊ መግለጫ ተሰጥቷል።

በመግለጫቸውም ከትናንት ጀምሮ በክልሉ አንዳንድ አካባቢዎች የንግድ ስራ ማቆም፣ መንገድ መዝጋት ብሎም ወደ ሁከትና ብጥብጥ የሚያመሩ አዝማሚያዎች ታይተዋል ብለዋል።

“ቀሪ እስረኞች ይፈቱ” የሚልና የልማት ተጠቃሚነትን መነሻ በማድረግ እየቀረበ ያለው የሰሞኑ እንቅስቃሴ አሁን ወደሁከት እየተቀየረ ያለበት ሁኔታ መፈጠሩ በመግለጫው ተገልጿል።

በዚህም በባቱ፣ በለገጣፎና በጅማ 8 ሰዎች ጉዳት የደረሰባቸው ሲሆን፥ በግልና በመንግስት ድርጅቶችና ተሽከርካሪዎች ላይም ጥፋት ደርሷል ብለዋል።

ወይዘሮ ኡሚ አባጀማል በመግለጫው አክለውም፥ ከሰሞኑ ከኢትዮጵያ ሶማሌ ክልል ተፈናቅለው በኦሮሚያ አማሬሳ ካምፕ ከተጠለሉ ወገኖች የ4 እንዲሁም በባሌ ዞን መደወላቡ ወረዳ በተፈጠረ ግጭት የ3 በድምሩ የ7 ሰዎች ህይወት ማለፉን አስታውቀዋል።

መንግስት የህዝቡን ጥያቄ ለመመለስ የተለያዩ ስራዎችን እየሰራ ባለበት በዚህ ወቅት ይህን መሰል ክስተት መፈጠሩ አግባብ አለመሆኑን ያስረዱት ወይዘሮ ኡሚ ፥የክልሉ መንግስት አሁንም አንገብጋቢ የህዝብ ጥያቄዎችን ለመመለስ ጥረቱን አጠናክሮ ይቀጥላል ብለዋል።

መንግስት ጥፋት ያደረሱ አካላት ላይ የማጣራት ስራ በመስራት ተገቢውን ህጋዊ እርምጃ የሚወስድ ሲሆን፥ ህብረተሰቡም በህዝብና በመንግስት መካከል የተጀመረውን የመደማመጥ ሂደት ከሚያደናቅፍ አፍራሽ ድርጊት እንዲታቀብ ጥሪ አቅርበዋል።

የኦህዴድ ማዕከላዊ ኮሚቴ በቅርቡ ያወጣውን መግለጫ መሰረት አድርጎ ስራዎችን ለመስራት ህዝቡ ጊዜ ሊሰጥ ይገባልም ብለዋል።

ምክትል ቢሮ ኃላፊዋ ተጨማሪ ጉዳቶች እንዳይደርሱ የሀይማኖት አባቶች፣ አባ ገዳዎችና የሀገር ሽማግሌዎች የጀመሩትን የማረጋጋት ስራ አጠናክረው እንዲቀጥሉ አሳስበዋል።

በግጭቱ ሳቢያ ለጠፋው የሰው ህይወት የክልሉ መንግስት የተሰማውን ልባዊ ሀዘን መግለፃቸውን ከኢፌዴሪ የመንግስት ኮሙዩኒኬሽን ጽህፈት ቤት ያገኘነው መረጃ ያመለክታል።