Fana: At a Speed of Life!

ምርጫ ቦርድ አብን ጠቅላላ ጉባኤውን በሁለት ወራት ጊዜ ውስጥ በድጋሚ እንዲያካሂድ ውሳኔ አሳለፈ

አዲስ አበባ ፣ ሚያዝያ 18 ፣ 2014 (ኤፍ ቢ ሲ) የኢትዮጵያ ብሔራዊ ምርጫ ቦርድ የአማራ ብሄራዊ ንቅናቄ (አብን) ጠቅላላ ጉባኤውን በሁለት ወራት ጊዜ ውስጥ በድጋሚ እንዲያካሂድ ውሳኔ አሳለፈ።
ቦርዱ ውሳኔውን ያሳለፈው አብን መጋቢት 23 ቀን 2014 ዓ.ም ያደረገውን ጠቅላላ ጉባኤ አስመልክቶ የቀረበለትን ሪፖርት ከመረመረ በኋላ ነው።

በዚህ መሰረት ፓርቲው ይህ ውሳኔ ከተገለጸበት ከሚያዝያ 18 ቀን 2014 ዓ.ም. ጀምሮ በሁለት ወራት ጊዜ ውስጥ እስከ ሰኔ 18 ቀን 2014 ዓ.ም ድረስ ጠቅላላ ጉባኤ እንዲያካሂድ እንዲሁም በደንቡ መሰረት የሚቀርጻቸውን ሌሎች አጀንዳዎችን ጨምሮ በጉባኤው የመነጋገር መብቱ እንደተጠበቀ ሆኖ ከዚህ ቀደም እልባት ያላገኘው አጀንዳ ማለትም “የአመራር ሪፎርም ወይም ለውጥ ማድረግ” የሚለው ለጉባኤው በአጀንዳነት ቀርቦ ተገቢው ውሳኔ እንዲሠጥበት እና አግባብነት ያለው ምርጫ እንዲደረግም ነው የወሰነው።

ከዚህ ባለፈም የመተዳደሪያ ደንቡ አንቀፆች ላይ ማሻሻያ በማድረግ ማሻሻያ የተደረገባቸው የመተዳደሪያ ደንቡ አንቀፆች የተካተቱበትን ረቂቅ መተዳደሪያ ደንብ ጉባኤው ከሚካሄድበት አምስት የስራ ቀናት አስቀድሞ ለቦርዱ እንዲያቀርብ እና ከላይ የተገለፁት ማስተካከያዎች የተደረገበት እና በቦርዱ በቅድሚያ የታየ የተሻሻለ የመተዳደሪያ ደንብ ለጠቅላላ ጉባኤው አቅርቦ በማጸደቅ እንዲያቀርብ መወሰኑን የቦርዱ መረጃ ያመላክታል።

በተጨማሪም ጉባኤው በተጠናቀቀ በአምስት ቀናት ውስጥ የጉባኤውን ዝርዝር ሂደት እና ውሳኔ የሚገልጽ ቃለ ጉባኤ፣ በጉባኤው የፀደቀውን መተዳደሪያ ደንብ እና የጠቅላላ ጉባኤውን ሪፖርት እንዲያቀርብም ወስኗል።

ቀደም ሲል በተደረገው የፓርቲው ጉባኤ ቦርዱ ሂደቱን በተሟላ ሁኔታ ለመታዘብ ይችል ዘንድ በቦርዱ የተመደቡት ባለሙያዎች ሂደቱን ለመቅረጽ ሲጀምሩ በፓርቲው አመራር የተከለከሉበት ሁኔታ ፓርቲው ሊያከብረው ከሚገባው፣ በአዋጅ 162 አንቀጽ 16 መሰረት ቦርዱ አዋጁን ለማስፈጸም በሚሰራቸው ተግባራት ከቦርዱ ጋር የመተባበር ግዴታ ተጻራሪ መሆኑ ታውቆ የቦርዱ ባለሙያዎች በቀጣይ ጉባኤ የሚያደርጉትን የሙያ ትዝብት ስራ፣ አስፈላጊ በሆነ መንገድ ሁሉ (ቀረጻን ጨምሮ) ያለምንም ተጽእኖ መከወን እንዲችሉ ፓርቲው ተገቢውን እንዲፈጽም ቦርዱ አሳስቧል።

You might also like

Leave A Reply

Your email address will not be published.