ቀጠናውን በአትሌቲክስ ብቻ ሳይሆን በጥበባት እና በባህል ፌስቲቫልም የሚታወቅ እናደርገዋለን-አቶ ደመቀ መኮንን

የውይይት መድረኩን የከፈቱት ምክትል ጠቅላይ ሚኒስትርና የውጭ ጉዳይ ሚኒስትር አቶ ደመቀ መኮንን÷ የምስራቅ አፍሪካ የጥበባትና የባህል ፌስቲቫል ለቀጠናችን ሰላም የህዝቦች ትስስርን ለማጠናከር ትልቅ ሚና አለው ብለዋል፡፡

የሕዝብ ለሕዝብ ግንኙነትን ለማጠናከር የባህል ዲፕሎማሲን በትኩረት መከወን እንደሚገባ እና በውጭ ጉዳያችን በኩል ዋናው የምንረባረበት የትኩረት ማዕከላችን የጎረቤት ሀገራትን መሰረት ያደረገ ግንኙነት መፍጠር መሆኑንም አመላክተዋል፡፡

እንዳለመታደል ሆኖ የምስራቅ አፍሪካ ቀጠና የሚታወቀው በጦርነት፣ በድርቅ፣ በርሃብ እና በስደት ነው ያሉት አቶ ደመቀ ይህንን ገፅታ መቀየር የምንችለው ሕዝብና ሕዝብን በጥበባትና በባህል በማስተሳሰር ተፈጥሮ ያደለችንን ፀጋ ተጠቅመን ቀጠናውን ስናለማ ነው ብለዋል፡፡

አያይዘውም የምስራቅ አፍሪካ ሀገራት የጥበብና የባህል ቋት መሆናቸውን እና የምስራቅ አፍሪካ የጥበባትና የባህል ፌስቲቫልን በጋራ ተርባርቦ በማቋቋም የማይቋረጥ የግንኙነት መሰረት መጣል ይቻላል ሲሉም አስገንዝበዋል፡፡

ቀጠናውንም በአትሌቲክስ ብቻ ሳይሆን በጥበባት እና በባህል ፌስቲቫልም የሚታወቅ እናደርገዋለን ያሉት አቶ ደመቀ በቀጠናችን በጋራ መልማት እድገትን የጋራ ገበያን ማስፋፋት የቀጠናው ህዝቦች የህልውና ጉዳይ ነው ማለታቸውንም ከባህል እና ቱሪዝም ሚኒስቴር ያገኘነው መረጃ ያመላክታል።

የባህልና ስፖርት ሚኒስትር አቶ ቀጄላ መርዳሳ በበኩላቸው÷ ኢትዮጵያ ጎረቤት መር በሆነ ግንኙነት ለዘመናት የዘለቀውን የምስራቅ አፍሪካ ሀገራት ግንኙነት በጥበብና በባህል በማስተሳሰር እና በማጎልበት በቀጣይ ቀጠናውን በኢኮኖሚ ለማስተሳስርና የቀጠናውን ህዝቦች የጋራ ተጠቃሚ ለማድረግ የሚያስችል መስረት የሚጣልበት ፌስቲቫል ተዘጋጅቷል ብለዋል፡፡

ፌስቲቫሉ የኢትዮጵያን ገፅታ በማስተዋወቅ፣ የቀጠናውን ሀገራት ሕዝቦች በማስተሳሰር፣ በማኅበራዊ፣ በኢኮኖሚያዊና በፖለቲካዊ ጉዳዮች ተጠቃሚ እንድንሆን ስለሚያደርገን አጋር አካላትና ባለድርሻ አካላት አብረን እንስራ ሲሉም ጥሪ አቅርበዋል፡፡