Fana: At a Speed of Life!

በኃይማኖት ሽፋን ያልተፈቀደ ሰልፍና የቡድን ሁከት በሚፈጥሩ አካላት ላይ እርምጃ እንደሚወስድ የድሬዳዋ አስተዳደር አስታወቀ

አዲስ አበባ ፣ ሚያዝያ 24 ፣ 2014 (ኤፍ ቢ ሲ) በኃይማኖት ሽፋን ስም የድሬዳዋን እና የአገርን ሁለንተናዊ እንቅስቃሴዎች ለማወከ የሚደረግ ያልተፈቀደ ሰልፍና የቡድን ሁከት በሚፈጥሩ አካላት ላይ እርምጃ እንደሚወሰድ የድሬዳዋ ከተማ አስተዳደር አስታወቀ።

የድሬዳዋ ከተማ አስተዳደር በወቅታዊ ሁኔታ ላይ ባወጣው መግለጫ÷ ለዘመናት በአንድነትና በጋራ የተሻገሩትን ህዝቦች ኃይማኖትን ተገን በማድረግ ለማጋጨት የሚደረጉ የሽብር እና ሁከት ለመፍጠር የሚደረጉ ተግባራት እንደማይሳኩ አመላክቷል፡፡

በብሔር፣ በስልጣን፣ በምርጫ እና በኃይማኖት ሽፋን የተጀመረው ሁከትና ግጭት የመፍጠር ሙከራም አይሳካም ነው ያለው፡፡

ኃይማኖትንና ብሔርን ሽፋን በማድረግ ሰሞኑን ፅንፍ የወጣው ተግባር የኢትዮጵያን ብልፅግና ለማረጋገጥ የሚደረገውን ጥረት ወደ ኋላ ለመጎተት የተሴረ እኩይ እና የተወገዘ ተግባር መሆኑንም ገልጿል፡፡

ባለፈው ሳምንት በስግደት ማብቂያ ላይ በድሬዳዋ ከተማ የተከሰቱት የግጭት ሙከራዎችም የዚሁ እኩይ ተግባር መገለጫ መሆናቸውን ጠቅሷል፡፡

ችግሩን አመራሮች፣ ህዝቡ፣ የፀጥታ አካላት እና የሙስሊሙ ማህበረሰብ ተረባርቦ እንዳከሸፈውም በመግለጫው አንስቷል።

ችግሩን ለመፍታት የአስተዳደሩ ከንቲባ የሚመራው የፀጥታ ምክር ቤት አስቸኳይ ስብሰባ በማካሄድ ከሚያዝያ 23 ቀን 2014 ዓ.ም ጀምሮ ያልተፈቀደ የጎዳና ሰልፍ እና የቡድን ጉዞ ማድረግ መከልከሉንም አስታውቋል።

ይህንን ውሳኔ ተላልፈው በሚገኙ አካላት ላይም አስፈላጊው እርምጃ ይወሰዳል ብሏል፡፡

የተጀመረውን የሰላም፣ የአብሮነትና የብልፅግና ጎዳና ዳር ለማድረስ በጋራ እንረባረብ ሲል ከተማ አስተዳደሩ ጥሪ ማቅረቡን ከድሬዳዋ ኮሙኒኬሽን ቢሮ ያገኘነው መረጃ ያመላክታል፡፡

You might also like

Leave A Reply

Your email address will not be published.