Fana: At a Speed of Life!

አዋሽ 3 የኃይል ማመንጫ ጣቢያ በጊዜያዊነት አገልግሎቱን አቋረጠ

አዲስ አበባ፣ ነሀሴ 26፣ 2012 (ኤፍ.ቢ.ሲ) አዋሽ 3 የኤሌክትሪክ ኃይል ማመንጫ ጣቢያ በጊዜያዊነት አገልግሎት ማቋረጡን የኢትዮጵያ ኤሌክትሪክ ኃይል አስታወቀ፡፡

በኢትዮጵያ ኤሌክትሪክ ኃይል የአዋሽ 2 እና 3 ኃይል ማመንጫ ጣቢያዎች ሥራ አስኪያጅ አቶ ዲሳሳ ገልሜሳ በጣቢያው ላይ የጎርፍ መጥለቅለቅ በማጋጠሙ ከቅዳሜ ነሐሴ 23 ቀን 2012 ዓ.ም ጀምሮ ጣቢያው ለጊዜው አገልግሎት ማቋረጡን አስታውቀዋል፡፡

በአዋሽ ወንዝ ላይ እየተከሰተ ያለው ጎርፍ እና የእንቦጭ አረም በቆቃ፣ በአዋሽ 2 እና 3 የኃይል ማመንጫ ጣቢያዎች የወደፊት ዕጣ ፋንታ ላይ ትልቅ ሥጋት ሆኗል ብለዋል፡፡

በአዋሽ ወንዝ ሙላት የተነሳ ከቆቃ ግድብ ከሐምሌ 15 ቀን 2012 ዓ.ም ጀምሮ በሰከንድ 60 ሜትር ኪዩብ ውኃ ሲለቀቅ የቆየ ቢሆንም የሚገባው የውሃ መጠን በየጊዜው እየጨመረ በመሆኑ ከግድቡ የሚለቀቀው የውሃ መጠን አሁን ላይ በሰከንድ 625 ሜትር ኪዩብ ውሃ መድረሱን ኃላፊው ተናግረዋል፡፡

በዚህም ላለፉት 49 ዓመታት አገልግሎት ሲሰጥ የቆየውና 32 ሜጋ ዋት የማመንጨት አቅም ያለው የአዋሽ 3 የኤሌክትሪክ ኃይል ማመንጫ ጣቢያ በውሃ መጥለቅለቅ አደጋ ምክንያት ላልተወሰነ ጊዜ አገልግሎት መስጠት አቁሟል ነው የተባለው፡፡

እንዲሁም ከተርባይን ወለል እስከ ተርባይን ሮተር ማገናኛ ዘንግ ድረስ ያሉት የኤሌክትሮ-መካኒካል እቃዎች በውሃ በመዋጣቸው የጉዳቱን መጠን ለማወቅ እንዳልተቻለ አቶ ዲሳሳ ተናግረዋል፡፡

በተመሳሳይ የአዋሽ 2 የውኃ ኃይል ማመንጫ ጣቢያ  የውሃ መቀበያ በእንቦጭ አረም በመዘጋቱ ከሀምሌ 23 ቀን 2012 ዓ.ም ጀምሮ አገልግሎቱ እየሰጠ እንደማይገኝ የተገለፀ ሲሆን ችግሩን በጊዜያዊነት ለመፍታት አረሙን በኤክስካቫተር የማንሳት ሥራ እየተከናወነ መሆኑን ገልፀዋል፡፡

አቶ ዲሳሳ በአዋሽ ተፋሰስ ላይ የሚገኙ የቆቃ፣ የአዋሽ 2 እና 3 የኤሌክትሪክ ኃይል ማመንጫ ጣቢያዎች የሚገጥማቸውን ተፈጥሯዊ ችግር በዘላቂነት ለመፍታት የቅንጅት ሥራ ያስፈልጋል ማለታቸውን ከኢትዮጵያ ኤሌክትሪክ ኃይል ያገኘነው መረጃ ያመላክታል፡፡

በአዋሽ ተፋሰስ ላይ የተገነቡት ሶስቱ ኃይል ማመንጫ ጣቢያዎች በድምሩ 107 ሜጋ ዋት ኤሌክትሪክ ኃይል የማመንጨት አቅም እንዲኖራቸው ተደርገው የተገነቡ ናቸው፡፡

#FBC
የዜና ሰዓት ሳይጠብቁ የፋና ብሮድካስቲንግ ኮርፖሬትን ትኩስ እና ሰበር ዜናዎችን በፍጥነት በአጭር የፅሁፍ መልዕክት መልክ በስልክዎ ላይ እንዲደርስዎ ወደ 8111 OK ብለው ይላኩ።

You might also like

Leave A Reply

Your email address will not be published.