Fana: At a Speed of Life!

አዲስ ወግ  አንድ ጉዳይ “የግብርናው ዘርፍ ቁልፍ የሪፎርም እርምጃዎች” በሚል ርዕስ ተካሄደ  

አዲስ አበባ፣ ጥር 27፣ 2012 (ኤፍ.ቢ.ሲ) አዲስ ወግ አንድ ጉዳይ “የግብርናው ዘርፍ ቁልፍ የሪፎርም እርምጃዎች” በሚል ርዕስ ተካሄደ።

መድረኩ የዘርፉ ባለ ድርሻ አካላትን በማሳተፍ ለግብርናው ዘርፍ ገንቢ የሆኑ ሀሳቦችን ማንሸራሸርና ግብአቶችን ለማግኘት በማለም መዘጋጀቱን የጠቅላይ ሚኒስትር ፅህፈት ቤት አስታውቋል።

በመድረኩ ላይ የዘርፉ ምሁራን የመወያያ መነሻ ፅሁፍ አቅርበው ውይይት ተደርጎባቸዋል።

የግብርና ተመራማሪው ፕሮፌሰር አለማየሁ ስዩም የግብርናውን ዘርፍ ውጤታማ ለማድረግ፥ የመሬት ይዞታ እና አጠቃቀምን ማሻሻል፣ በረጅም ጊዜ ይዞታ ላይ ማተኮር እንዲሁም ፖሊሲዎችን ማሻሻልና አሠራሮችን ማዘመን ላይ ትኩረት ማድረግ ይገባል ብለዋል።

የእንስሳት ሀብት ስፔሻሊስቱ ዶክተር ወርቅነህ አያሌው በበኩላቸው አዳዲስ መዋቅሮችን ለመፍጠር ከመሞከር ይልቅ የባለድርሻ አካላትን ትስስር ማሻሻል ምርታማነትን እንደሚጨምር ተናግረዋል።

በኢንቨስትመንት ደረጃ የእንስሳት ሀብት ላይ እየተሠራ አለመሆኑም የእንስሳት ተዋጽኦዎችን ለመላክ ካለው ሀገራዊ ፍላጎት ጋር የሚጣጣም አለመሆኑን ጠቅሰዋል።

የግል የእንስሳት ሀብት ልማትን በቴክኖሎጂ ማገዝና ማስፋፋት ምርታማነትን ለመጨመር እና የሥራ ዕድል ለመፍጠር እንደሚያግዝም ገልጸዋል።

የኦሮሚያ ግብርና ሕብረት ሥራ ፌዴሬሽን ተወካይ ወይዘሮ አስከበረች በላይነህ፥ የአፈር ማዳበሪያን ለህብረት ስራ ማህበራት ከማቅረብ ይልቅ ተጠቃሎ በማኅበራቱ ቢያዝ ስራን ለማቀላጠፍ እንደሚያግዝ ጠቁመዋል።

ከዚህ ባለፈም ማኅበራቱ የራሳቸውን ማሰልጠኛ ተቋማት ቢያቋቁሙ የስራ እድል ፈጠራ ላይ የተሻለ ማከናወን እንዲችሉ ያደርጋቸዋልም ነው ያሉት።

ለማኅበራቱ የሚደረጉ ድጋፎችን ማጠናከር፣ ባንኮች ያለ ብዙ መያዣና ቅድመ ሁኔታ መጠኑ ከፍ ያለ ወለድ ለአርብቶ አደሮችና አርሶ አደሮች ማመቻቸት እንዲሁም አዋጁን ማዕከል ያደረገና የተፋጠነ ሀገራዊ እንቅስቃሴ ማድረግ ምርታማነት እንደሚጨምርም አንስተዋል።

የሆራይዘን ፕላንቴሽን ሥራ አስኪያጅ አቶ ጀማል አሕመድ በግብርናው ዘርፍ፥ ተሰሚነት የማጣት፣ ግንዛቤ ያለመኖር እና አላስፈላጊ የሆነና ሥራን የሚያወሳስብ ቁጥጥር የግል ባለሃብቱን የሚያጋጥሙት ችግሮች መሆናቸውን ጠቅሰዋል።

የሸማቹን ፍላጎት ባጣጣመ መልኩ በዕቅድ የተመረጡ ሰብሎች ላይ አተኩሮ መሥራት እና በምርምር የታገዘ የምርት ጥራትን ማዳበር አስፈላጊ መሆኑንም አውስተዋል።

You might also like

Leave A Reply

Your email address will not be published.