Fana: At a Speed of Life!

የዳያስፖራው ንቅናቄ ከመቼውም ጊዜ በላይ በአገሩ ጉዳይ በአንድነት መቆሙን ያሳያል – ምሁራን

አዲስ አበባ፣ ህዳር 13፣ 2014 (ኤፍ ቢ ሲ) የምዕራባውያንን ጫና የተቃወመው የዳያስፖራው ንቅናቄ ዳያስፖራው ከመቼውም ጊዜ በላይ በአገሩ ጉዳይ በአንድነት መቆሙን የሚያሳይ ነው መሆኑን ምሁራን ገለጹ፡፡
ከፋና ብሮድካስቲንግ ኮርፖሬት ጋር ቆይታ ያደረጉት በባህርዳር ዩኒቨርሲቲ የፖለቲካ እና ዓለም አቀፍ ግንኙነት መምህሩ ዶክተር ፍሬው ይርጋአለም÷ ዳያስፖራዎች የምዕራባውያንን ጫና ለማውገዝ ያደረጉት ሰልፍ የኢትዮጵያ ድምፅ የተስተጋባበትና የሚዲያዎቻቸውን ሴራ ያጋለጡበት መሆኑን ተናግረዋል፡፡
ከዚህ ቀደም በአገር ውስጥ ፖለቲካ የተራራቀ አቋም የነበረው የዳያስፖራው ማህበረሰብ በአንድ መቆም የታየበት፥ በውጤቱም ለአገሩ ያለውን ፍቅር የገለጸበት መሆኑንም ጠቁመዋል፡፡
በአሜሪካ ፖለቲካ ውስጥ ተጽዕኖ መፍጠር የሚችሉት ኢትዮጵያውያን ስለ አገራቸው እውነታ ድምጻቸውን በቃን ብለው ማሰማታቸው በአሜሪካ መንግስትና በሚዲያዎቻቸው ላይ ጫና እንደሚፈጥርም አንስተዋል፡፡
በዚህ ፈተና ወቅት ግን በአራቱም ማዕዘናት ያሉት ኢትዮጵያውያን ስለአገራቸው በጋራ መነሳት ፖለቲካዊ አንድምታው ግልጽ መሆኑን የፖለቲካ ሳይንስ ምሁሩ ተናግረዋል ።
መንግስትም ይህንን መነሳሳት ፈር በማስያዝ በኢኮኖሚ ጭምር አገርን መጥቀም የሚችሉበትን ተጨባጭ ውጤት የሚያስመዘግብበትን ብልሃት መዘርጋት አለበት ነው ያሉት፡፡
በዲላ ዩኒቨርሲቲ የኮሙኒኬሽን መምህሩ አቶ አያሌው ደጀን በበኩላቸው ÷ ሰልፉ የኢትዮጵያን ሀቅ እና እውነታ በማሳየት በሀሰት ዘገባ ስርጭት የአገሪቱን ገጽታ ሲያጠፉ ለከረሙ ሚዲያዎች ጠንካራ መልዕክት የተላለፈበት እና በተአማኒነታቸው ላይም ጥያቄ እንዲፈጠር የሚያስገድድ ነው ብለዋል ።
በሚዲያዎች ለረዘመው የሀሰት ፕሮፓጋንዳ ዘመቻቸው ትክክለኛ ምላሹ ይህን መሰል የተቀናጀ ሰልፍ መሆኑንም አስገንዝበዋል፡፡
በሌላ በኩል ዳስፖራዎች በኢኮኖሚ ላይ ላነጣጠረውን የአሜሪካ አና አጋሮቿ ጣልቃ ገብነት ደግሞ የውጭ ምንዛሬን በብዛት በህጋዊ መንገድ ወደ አገር መላክ ላይ መስራት እንዳለባቸው ጠቁመዋል፡፡
በማህበራዊ ትስስር ገጾች ዘመቻውን እያቀጣጠሉት የሚገኙ የዳያስፖራው ማህበረሰብ ፣ ምሁራን እና ተጽዕኖ ፈጣሪ ግለሰቦችም ስለ ኢትዮጵያ ድምጽ መሆናቸውን አጠናክረው እንዲቀጥሉ ምሁራኑ ጥሪ አቅርበዋል።
በሃይለኢየሱስ መኮንን
You might also like

Leave A Reply

Your email address will not be published.