የአረፋ በዓልን ስናከብር ራሳችንን ከኮቪድ-19 ወረርሽኝ በመጠበቅ ሊሆን ይገባል- ጤና ሚኒስቴር

ዶክተር ሊያ ህዝበ ሙስሊሙ በዓሉን በቤቱ ሆኖ ማሳለፍ እንዳለበት ጠቅሰው፤ በአስገዳጅ ሁኔታ ለገበያና ለሌላ ጉዳይ ከቤቱ የሚወጣ ከሆነ ራሱን መጠበቅ እንዳለበትም አሳስበዋል።

ሚኒስትሯ በዚሁ ወቅት እንደገለጹት፣ በሀገሪቱ ከማህበራዊ መስተጋብር ጋር ተያይዞ በኮቪድ-19 የሚያዘው ሰው ቁጥር ከእለት ወደ እለት እየጨመረ መጥቷል።

ወረርሽኙ ሰው የሚሰባሰቡበት እና ያልተገደበ እንቅስቃሴ በሚበዛበት ቦታ ስርጭቱ ስለሚጨምር ህዝበ ሙስሊሙ ጥንቃቄን እንዳይዘነጋ አስገንዝበዋል።

እንደ እምነት አባቶች ሁሉ የመጣብንን ፈተና በትዕግስትና በጥንቃቄ በማለፍ አርዓያነታችንን ለትውልድ ማትረፍ አለብንም ብለዋል።

ህዝበ ሙስሊሙ ከዚህ በፊት እንደሚያደርገው ሁሉ በወረርሽኙ ሳቢያ ለችግር የተዳረጉ ዜጎችንም በማሰብ ሊሆን እንደሚገባም ጠይቀዋል።

በዓሉን አስመልክተው ከቦታ ወደ ቦታ እንቅስቃሴ የሚያደርጉ ሰዎችና የግብይት ሥርዓት የሚፈጽሙ ሰዎች ጥንቃቄ እንዳይለያቸው አሳስበዋል።

በአገሪቱ በኮቪድ-19 የተያዙ ሰዎች ቁጥር 15 ሺህ እንደተሻገረ ጠቅሰው፤ የሟቾች ቁጥር እየጨመረ በመምጣቱ ከመቼውም ጊዜ በላይ ጥንቃቄ ማድረግ እንደሚገባ ማስገንዘባቸውን ኢዜአ ዘግቧል።

#FBC

የዜና ሰዓት ሳይጠብቁ የፋና ብሮድካስቲንግ ኮርፖሬትን ትኩስ እና ሰበር ዜናዎችን በፍጥነት በአጭር የፅሁፍ መልዕክት መልክ በስልክዎ ላይ እንዲደርስዎ ወደ 8111 OK ብለው ይላኩ።