የኢኖቬሽንና ቴክኖሎጂ ሚኒስቴር በኮሮናቫይረስ ዙሪያ የሚሰሩ የፈጠራ ስራዎችን በገንዘብ ለመደገፍ ከዩ.ኤን.ዲ.ፒ ጋር ተስማማ

ስምምነቱ የተፈፀመው የኢኖቬሽንና ቴክኖሎጂ ሚኒስትር ዴኤታ አቶ ሲሳይ ቶላ እና በኢትዮጵያ የዩኤንዲፒ ተወካይ ቱርሀን ሳለህ በቪዲዮ ኮንፈረንስ በታገዘ ከተወያዩ በኋላ ነው።

ሚኒስትር ዴኤታ አቶ ሲሳይ፥ ስምምነቱ የኮሮና ቫይረስን ለመለየት፣ ለመከላከልና ለማከም የሚደረጉ የተናጠል የቴክኖሎጂና ኢኖቬሽን ጥረቶችን ለማቀናጀት የሚያስችል ማዕቀፍ ለመፍጠር ያለመ መሆኑን ገልፀዋል።

በወረርሽኙ ዙሪያ የተለያዩ የፈጠራና ምርምር ስራዎች ያሏቸውን ባለሙያዎች መፍትሄዎቻቸውን በማወዳደር ጥቅም ላይ ለማዋልእንደሚረዳም ነው ያስታወቁት።

በስምምነቱ የ1 ሚልየን ዶላር የገንዘብ ድጋፍ የተዘጋጀ ሲሆን፥ የፈጠራና ምርምር ስራዎቹ ድጋፉን የሚያገኙት በውድድር ሆኖ በእጭር ጊዜ ወደ ስራ ገብቶ በ3 ወራት ውስጥ የሚጠናቀቅ ነው።

ማእቀፉ ከዚህ በፊት በሽታውን ለመከላከልና የህክምና ስራውን ለማገዝ በመንግስት፣ በግለሰቦችና በአጋር ድርጅቶች ሲደረጉ የነበሩ ድጋፎችን በተቀናጀ መልኩ ለማስኬድ ይረዳል።