የወራቤ ሆስፒታል የጥናት እና ምርምር ማዕከል እንዲሆን እየተሰራ ነው

አዲስ አበባ፣የካቲት 17፣2012(ኤፍ.ቢ.ሲ)የወራቤ ኮምፕሬንሲቭ  ስፔሻላይዝድ ሆስፒታል የጥናት እና ምርምር ማእከል እንዲሆን እየተሰራ  መሆኑ ተገለጸ፡፡

የሆስፒታሉ ዋና ስራ አስኪያጅ አቶ ጀማል ሽፋ ÷ በሆስፒታሉ የልብ፣የካንሰር እና የኩላሊት ህክምናዎችን ለመጀመር እንቅስቃሴ እየተደረገ  መሆኑን ከፋና ብሮድካስቲንግ ኮርፖሬት ጋር ባደረጉት ቆይታ ገልጸዋል።

ሆስፒታሉ በቅርቡ የፕላስቲክ ቀዶ ህክምናን መስጠት መጀመሩን የጠቆሙት  ሃላፊው፥ ከዚህ በተጨማሪ ከአንገት በላይ ህክምና ፣ የአጥንት ህክምና፣ አጠቃላይ ቀዶ ህክምና፣ የስነ አዕምሮ እንዲሁም የህፃናት ህክምና በመስጠት ላይ መሆኑን ገልጸዋል፡፡

የሆስፒታሉን አሰራር በቴክኖሎጂ የማዘመን ስራ መጀመሩንም ጠቁመዋል።

በስልጤ ማህብረሰብ ወጭ በ 300 ሚሊየን ብር የተገነባው እና 5ኛ ዓመቱን የያዘው ሆስፒታሉ  584 አልጋዎችን   መያዙ ተገልጿል፡፡

በሆስፒታሉ በየቀኑ ከ 700 በላይ ታካሚዎች የሚስተናገዱ ሲሆን÷ በሳምንት ከ90 በላይ ትላልቅ የቀዶ ጥገና  ህክምናዎች የሚሰጡ መሆኑም ተመላክቷል።

በዙፋን ካሳሁን