Federeeshinichii fi Atleet Daraartuun Hidha Haaromsaa fi koroonaa ittisuuf deeggarsa taasisan
Finfinnee, Bitootessa 17,2012(FBC) – Federeeshiniin Atleetiksii Ityoophiyaa ijaarsa Hidha Haaromsaa fi weerara vaayrasii koroonaa ittisuuf deeggarsa Birrii miiliyoona 2 laate.
Federeeshinichi Hidha Haaromsaatif Birrii miiliyoona 1, weerara vaayrasii koroonaa ittisuuf ammoo Birrii miiliyoona 1; waliigalaan Birrii miiliyoona 2 laatera.
Preezdaantiin federeeshinichaa Koomaandar Atleet Daraartuu Tulluun Waajjira Qindeessaa Hirmaannaa Ummataa Ijaarsa Hidha Haaromsaatti argamuun deeggarsicha laattetti.
Federeeshinichi kanaan duras ijaarsa hidhichaatif deeggarsa Birrii miiliyoona 3 laatera.
Koomaandar Atleet Daraartuu Tulluun dhuunfadhaan hidhichaaf deeggarsa Birrii kuma dhibba 2, weerara vaayrasii koroonaa ittisuuf ammoo deeggarsa Birrii kuma dhibba 2; waliigalaan Birrii kuma dhibba 4 laattetti.
Hoggantuun Waajjira Qindeessaa Hirmaannaa Ummataa Ijaarsa Hidha Haaromsaa aadde Roomaan G/sillaaseen gumaacha federeeshinichaa fi Atleet Daraartuuf galateeffataniiru.
Weerara vaayrasii koroonaa ittisuuf gumaacha taasifameef ministirri Ministeera Fayyaa Dooktar Liyaa Taaddasaa fi ministir deettaan ministeerichaa Dooktar Darajjee Dhugumaan galateeffataniiru.