Afrikal Koroonah Vayresit Yibbixsime Marih Qadad 15 Alfiik Daga Yekke
Addis Ababa, Qasa Dirri 06, 2012 ILL (FBC) Afrikah Qaran Gubal Koroonah Vayresit Yibbixsime Marih Qadad 15 Alfiik Daga Yekkem Qaddoosen.
Away Baad Caddol Koroonah Vayresit Yibbixsime Marih Qadad 1 Miliyoon 900 Alfiik Daga Yekkeh Yanim Jon Hopkins Universitih Oyti Yascasse.
Tamakkeh Fanak 15 Alfi 346 Afrikah Qaran Guba Kinnim Qaddoosen.
Baadal Koroonah Vayresiik Gexxaamah 119 Alfiik Daga Yakke Mari Edde Rabeeh, Afrikal Kaaduk Rabeh Yan Marih Qadad 830 Tatreh Geytima.
Afrikal 2 Alfi 940 Num Tama Dalkak Qaffooteh Yanim Kassiisah Yan Tama Jaamiqatih Oyti, Baad Caddol Kaaduk 450 Alfiik Daga Yakke Mari Tama Dalkak Qaffooteh Yanim Qaddoosen.
Afrikah Qaran Gubal 2 Alfi 272 Num Koroonah Vayresit Teetik Yibbixsimeh Yan Gabbi Afrika Naharsi Caddol Miraacisak Geytimta..
Tama Baaxol Koroonah Vayresit Yibbixsimeh Yan Marak 27 Num Rabeh Yanim Kee 410 Num Tama Dalkak Qaffooteh Yanim Warsen.
Masril Aham Fanah 2 Alfi 190 Num Tama Vayres Yibbixeh Geytimam Asacssuuk, Tamakkeh Fanak 589 Num Qaffooteeh, 164 Num Edde Rabeh Yanim Yiysixxigen.
Aljeeriyal 1 Alfi 983 Num Ta Vayresit Abbixsimuk, 313 Num Akak Rabeeh, 601 Num Kaaduk Tama Dalkak Qaffooteh Geytima.
Ayro Mawqah Afrikah Baaxoh Tan Keniyal 208 Num Koroonah Vayresit Abbixsimuk, Tamakkeh Fanak 40 Num Qaffootak, 9 Num Teetik Rabeh Yanim Warsen.
Jabuutil 298 Num, Eretiriyal 34 Num, Somaliyal 60 Num, Suudaanal 29 Num Tonnah Gabbi Suudaanal 4 Num Tama Vayresit Yibbixsimeh Yanim Oyti Yascasse.
Itiyoppiyal Asaakih Ayro Fanah Tama Dalkat Yibbixsime Marih Qadad 82 Num Kinnuuk, 14 Num Akak Qaffootak 3 Num Tama Dalkah Rabeh Geytima.