Fana: At a Speed of Life!

የብልጽግና ፓርቲ ሥራ አስፈጻሚ ኮሚቴ በወቅታዊ አገራዊ ጉዳዮችና አካታች አገራዊ ምክክር አስፈላጊነት ላይ ተወያይቶ አቅጣጫዎችን አስቀመጠ

አዲስ አበባ ፣ ህዳር 30 ፣ 2014 (ኤፍ ቢ ሲ) የብልጽግና ፓርቲ ሥራ አስፈጻሚ ኮሚቴ ዛሬ ኅዳር 30 ቀን 2014 ዓ.ም ባደረገው ስብሰባ የአገርን ህልውና ለማጽናትና ዴሞክራሲን ለማጎልበት የሚያስችሉ አቅጣጫዎችን ማስቀመጡን የፓርቲው ጽህፈት ቤት ኃላፊ አቶ አደም ፋራህ ገልፀዋል።

እንደ አቶ አደም ፋራህ ገለፃ የሥራ አስፈጻሚ ኮሚቴው ወቅታዊ አገራዊ ሁኔታውን የገመገመ ሲሆን የአገርን ህልውና ለማስጠበቅ በተደረገው ዘመቻ ለኅብረ ብሔራዊ አንድነት የተገኘውን ውጤት አድንቋል።

በዘመቻው አመርቂ ውጤት እንዲገኝ የአገር መከላከያ ሠራዊት፣ የክልል የጸጥታ ኃይሎች፣ ደጀኑ ሕዝብና በአገር ውስጥና በውጭ አገራት የሚገኙ ኢትዮጵያውያንና ትውልደ ኢትዮጵያውያን ላደረጉት ርብርብና ከፍተኛ አስተዋጽኦ ኮሚቴው ምስጋና አቅርቧል።

ኅብረተሰቡ ያሳየው ርብርብና ኅብረ ብሔራዊ አንድነት ይበልጥ እንዲጎለብትና በቀጣይም ሌሎች ድሎች እንዲመዘገቡ በሚያደርግ ሁኔታ ድጋፉ ተጠናክሮ እንዲቀጥል ሥራ አስፈጻሚው ጥሪ ማቅረቡን ኃላፊው ገልፀዋል።

ከአሸባሪው ወራሪ ነጻ የወጡ አካባቢዎችን መልሶ ለማደራጀትና ለማቋቋም የተጀመረው ሥራ በመልካም ሁኔታ እየተከናወነ መሆኑን ሥራ አስፈጻሚው የገመገመ ሲሆን ሥራው በተቀናጀ አግባብ ተጠናክሮ መቀጠል እንዳለበትም አምኖበታል።

ለመልሶ ማቋቋምና ማደራጀት ሕዝቡ አስፈላጊውን ድጋፍ እንዲያደርግ ሥራ አስፈጻሚው ጥሪ ማቅረቡንም ነው ኃላፊው የገለፁት።

የፓርቲው አመራሮችና አባላትም ለተጀመረው የማደራጀትና መልሶ ማቋቋም እንቅስቃሴ የሚጠበቅባቸውን ሁሉ እንዲያደርጉ አቅጣጫ አስቀምጧል።

ሥራ አስፈጻሚው በአገራችን የተጀመረውን የፖለቲካ ሽግግር ሂደት ስለሚጠናከርበት ሁኔታም መምከሩን ገልፀዋል።

በዚሁ መሰረተ አካታችነትና ሁሉን አቀፍ ምክክር ከለውጡ መነሻ ጀምሮ ሲቀነቀን የነበረ ሐሳብ መሆኑ የታየ ሲሆን በአገራችን አካታች አገራዊ ምክክር አስፈላጊ መሆኑን አምኖበታል ብለዋል።

አካታች አገራዊ ምክክሩም አገር በቀል የሆነ፣ በመሰረታዊ ሀገራዊ ጉዳዮች ላይ ብሔራዊ መግባባት ለመፍጠር የሚያግዝ፣ ከሕዝባችን ባህልና ዕሴት ጋር የሚጣጣም፣ የአገራችንን ሉዓላዊነትና የግዛት አንድነት በዘላቂነት ለማስከበር የሚረዳ መሆን እንዳለበት አጽንኦት ተሰጥቶታልም ነው ያሉት።

የታሰበው አገራዊ ምክክር እንዲሳካም ገለልተኛ የሆነና ብቃት ያለው አገራዊ ተቋም መመራት እንዳለበት ሥራ አስፈጻሚው እንዳመነበት ጠቅሰው፥ አካታች ምክክሩ እንዲሳካና የሚፈለገውን ውጤት እንዲያመጣም ብልጽግና ፓርቲ እንደመሪ ፓርቲ የሚጠበቀበትን ኃላፊነት እንደሚወጣ የሥራ አስፈፃሚ ኮሚቴው ማረጋገጡንም ኃላፊው አክለው ገልፀዋል።

አካባቢዎን ይጠብቁ!
ወደ ግንባር ይዝመቱ!
መከላከያን ይደግፉ!

ወቅታዊ፣ትኩስ እና የተሟሉ መረጃዎችን ለማግኘት፡-
ድረ ገጽ፦ https://www.fanabc.com/
ፌስቡክ፡- https://www.facebook.com/fanabroadcasting
ዩትዩብ፦ https://www.youtube.com/c/fanabroadcastingcorporate/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡

ዘወትር፦ ከእኛ ጋር ስላሉ እናመሰግናለን!

You might also like

Leave A Reply

Your email address will not be published.