Fana: At a Speed of Life!

የአዲስ አበባ ከተማ አመራሮች በህልውና ትግሉ ድሎችና በድህረ ጦርነት ችግሮች ላይ እየተወያዩ ነው

 

አዲስ አበባ፣ ታህሳስ 21፣ 2014 (ኤፍ ቢ) የኢትዮጵያን ህልውና ለማስጠበቅ በተካሄደው ትግል የተገኙ ድሎችን ለማስቀጠል እና በድህረ ጦርነት ሊያጋጥሙ የሚችሉ ችግሮችን መፍታት ስለሚቻልበት ሁኔታ የአዲስ አበባ ከተማ አመራሮች ውይይት እያካሄዱ ነው፡፡

በአዲስ ከተማ ምክር ቤት የመንግስት ዋና ተጠሪው አቶ መለሰ አለሙ ለአዲስ ሚዲያ ኔት ዎርክ እንደተናገሩት ጦርነቱን በድል ለማጠናቀቅ የረዳውን የወገን ሀይል አንድነት እና ትብብር በማጠናከር ድሉን ሁለንተናዊ ማድረግ የውይይቱ ዋነኛ አላማ ነው፡፡

ኢትዮጵያ በውጭም በውስጥም ሀይሎች የተጋረጡባትን ፈተናዎች በህዝቧ የተባበረ ትግል በድል መክታለች ብለዋል፡፡

ይህንን የተገኘውን ድል እንዴት አስጠብቆ ወደ ሁለንተናዊ ድል ማሸጋገር ይገባል እና በድህረ ጦርነት ሊያጋጥሙ የሚችሉ ችግሮችንስ እንዴት መፍታት ይቻላል በሚሉ ጉዳዮች ላይ ነው የከተማ አስተዳደሩ አመራሮች እየተወያዩ የሚገኙት፡፡

በአዲስ አበባ ምክር ቤት የመንግስት ቋሚ ተጠሪ አቶ መለሰ አለሙ እንደተናገሩት፥ ውይይቱ በድህረ ጦርነት ሊያጋጥሙ የሚችሉ ዝንፈቶችን በጋራ ለማስተካከል ያለመ ነው፡፡

በጦርነቱ ድል እንዲመዘገብ ያስቻለውን አንድነት እና ትብብር ለማጠናከር እና ያሉ ችግሮችን እያረሙ በዋና ዋና ሀገራዊ ግቦች ላይ አተኩሮ ለመስራት እንዲቻል ውይይቱ መጀመሩን ነው አቶ መለሰ የሚናገሩት፡፡

አንድነትን ማጠናከር እና በድል ማግስት ሊያጋጥሙ የሚችሉ ችግሮችን ቀድሞ ለይቶ መፍታት ከውይይት መድረኩ የሚጠበቅ ውጤት እንደሆነም አመልክተዋል፡፡

መሰል የውይይት መድረኮች በቀጣይም በሁሉም የከተማ አስተዳደሩ መዋቅሮች እና በነዋሪው ህዝብ ደረጃ ጭምር እንደሚካሄዱም ነው የተገለጸው፡፡

You might also like

Leave A Reply

Your email address will not be published.