ባለስልጣኑ ለ4 ሬዲዮ ብሮድካስት ባለፈቃዶች የመጨረሻ ማስጠንቀቂያ ሰጠ

ባለስልጣኑ ጉዳዩን አስመልክቶ በማህበራዊ ትስስር ገጹ ባወጣው ማብራሪያ ÷ጄ ሬዲዮ ጣቢያ 106.7 የተሰኘው ባለፈቃድ የሬድዮ ፈቃዱን ካገኘ ጀምሮ ሙዚቃ ብቻ በማጫወት በውድድር ፈቃድ ከወሰደበት ውል ውጪ እየሰራና ውስን የሆነውን የሬድዮ ሞገድ ከታለመለት አላማ ውጪ ለብክነት እየዳረገ ይገኛል ብሏል፡፡

በውድድር የሚገኝን ይህን ውድ የሀገርና የህዝብ ሀብት ለተፈቀደው እና ውል ለተገባበት አላማ እንዲውል በባለሥልጣን መስሪያ ቤቱ በተደጋጋሚ ጊዜ ማሳሰቢያና ማስጠንቀቂያ የተሰጠ ቢሆንም በድርጅቱ በኩል የተለወጠ ነገር አለመኖሩ ተጠቁሟል ፡፡

ስለዚህም ሬድዮ ጣቢያው እስከ መጋቢት 01 ቀን 2014 ዓ.ም ድረስ ውል በገባው መሰረት መደበኛ ስርጭቱን ካልጀመረ ፈቃዱ በቀጥታ እንደሚሰረዝ ባለስልጣኑ አስጠንቅቋል፡፡

በሌላ በኩል አዲስ ኦንላይን፣ ትርታ ትሬዲንግ እና ኢትዮ ዋርካ የተሰኙ ድርጅቶች በመገናኛ ብዙኃን አዋጅ ቁጥር 1238/2013 አንቀጽ 80 መሠረት ከባለሥልጣን መ/ቤቱ የንግድ ሬዲዮ ብሮድካስት አገልግሎት ፈቃድ ወስደው ከአንድ ዓመት በላይ ቢሞላቸውም በህጉ መሰረት መደበኛ ስርጭት ባለመጀመራቸው በተደጋጋሚ ጊዜ ድጋፍ፣ ማሳሰቢያ እና የማስጠንቀቂያ ደብዳቤ ሲደርሳቸው ቆይቷል፡፡

ነገር ግን አሁንም መደበኛ ስርጭት ያልጀመሩ በመሆኑ ለመጨረሻ ጊዜ እስከ መጋቢት 01 ቀን 2014 ዓ.ም ድረስ በገቡት ውል መሰረት መደበኛ ስርጭት ካልጀመሩ በቀጥታ ፈቃዳቸው የሚሰርዝ መሆኑን ባለሥልጣኑ አስታውቋል፡፡

በመሆኑም ድርጅቶቹ የተሰጣቸው የመጨረሻ ማስጠንቀቂያ አክብረው እስከ መጋቢት 01 ድረስ መደበኛ ስርጭት ካልጀመሩ የመገናኛ ብዙኃን ባለሥልጣን በአዋጅ በተሰጠው ኃላፊነት መሰረት እጅግ ውስን የሆነውን የሬድዮ ሞገድ ጨረታ አውጥቶ በማወዳደር ለሀገርና ህዝብ ጥቅም እንደሚያውል አሳውቋል፡፡

ኢትዮጵያን፦ እናልማ፣ እንገንባ፣ እንዘጋጅ
ወቅታዊ፣ትኩስ እና የተሟሉ መረጃዎችን ለማግኘት፡-
ድረ ገጽ፦ https://www.fanabc.com/
ፌስቡክ፡- https://www.facebook.com/fanabroadcasting
ዩትዩብ፦ https://www.youtube.com/c/fanabroadcastingcorporate/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡
ዘወትር፦ ከእኛ ጋር ስላሉ እናመሰግናለን!