ፓርቲው በጉባዔው የሰላምና የኑሮ ውድነት ላይ የመፍትሄ አቅጣጫ ያስቀምጣል ብለን እንጠብቃለን – የመዲናዋ ነዋሪዎች

የአዲስ አበባ ነዋሪዎች በአሁኑ ወቅት በተለይም የምግብ ፍጆታ ጉዳይ ከባድ ፈተና ሆኖብናል ብለዋል።

የሸቀጦች ዋጋ መናር፣ በዓለም ላይ የሚስተዋለውን የሰላምና መረጋጋት እጦት ተከትሎ የነዳጅ ዋጋ እየናረ መምጣትና የዘይት ዋጋ ማሻቀብም የተደራረበ ችግር እያስከተለ መሆኑን ጠቅሰዋል።

የመልካም አስተዳደር ችግር፣ የሰላም ጉዳይ፣ ሌብነት፣ ዘረፋና የህገ ወጦች መበራከትም ህዝብን ለእንግልትና ችግር እየዳረገ መሆኑን ነዋሪዎቹ ገልጸዋል።

እነዚህና ሌሎች አገራዊ ችግሮች ባሉበት ወቅት ጉባኤውን የሚያካሂደው ገዥው ፓርቲ ብልጽግና በተለይም በኑሮ ውድነትና የዋጋ ግሽበት ላይ በጥልቀት መክሮ ጊዜያዊና ዘላቂ የመፍትሄ አቅጣጫዎችን ያስቀምጣል ብለን እንጠብቃለን ብለዋል።

ከዚህ ባለፈም ለወጣቶች የስራ አድል ፈጠራ መንግስት ልዩ ትኩረት ሰጥቶ ሊሰራ ይገባልም ነው ያሉት።

የብልጽግና ፓርቲ በጉባኤው በጥልቀት መክሮ ኢትዮጵያን ወደ ተሻለ ምዕራፍ ሊያሸጋግር የሚችል ውሳኔ ያሳልፋል የሚል ተስፋ እንዳላቸውም ነው ነዋሪዎቹ ለኢዜአ የገለጹት።

የብልጽግና ፓርቲ ጠቅላላ ጉባዔ ከነገ ጀምሮ ለሶስት ቀናት በአዲስ አበባ የሚካሄድ ሲሆን÷ በጉባዔው ወቅታዊና አገራዊ ጉዳዮች ተነስተው ለመፍትሄው አቅጣጫ እንደሚቀመጥ ይጠበቃል።