የደቡብ ክልል ምክር ቤት መደበኛ ጉባኤውን ማካሄድ ጀመረ

የምክር ቤቱ አፈ ጉባኤ ወይዘሮ ፋጤ ሰርሞሎ በጉባኤው መክፈቻ ባደረጉት ንግግር ÷ ምክር ቤቶች ለመልካም አስተዳደር፣ ልማትና ፍትህ መረጋገጥ ትልቅ ሃላፊነት የተሰጣቸው በመሆኑ ይህን ሃላፊነታቸውን በትጋት ሊወጡ ይገባል ብለዋል።

ከዚህ አኳያም የክልሉ ምክር ቤት ቋሚ ኮሚቴዎች አስፈጻሚ መስሪያ ቤቶችን በመገምገምና በመደገፍ ህዝብን ተጠቃሚ ማድረግ የሚችል ለውጥ እንዲመጣ እየሰሩ ነው መሆኑን ተናግረዋል።

በቀጣይም በግብርናው ዘርፍ የምርት ምርታማነት እድገት እንዲጨምር፣የግንባታ ፕሮጀክቶች ጥራትና የግንባታ ጊዜ እንዲጠበቅ፣ የአገልግሎት አሰጣጥ እንዲሻሻል፣ የወጣቶችና የሴቶች የስራ እድል ፈጠራ እንዲጠናከር፣ አገራዊ ምክክሩ ስኬታማ እንዲሆን ሁሉም ባለድርሻ አካላት በተለይም ደግሞ የምክር ቤት አባላት ሚናቸውን በአግባቡ ሊወጡ እንደሚገባ ወ/ሮ ፋጤ አሳስበዋል።

በተለይም ደግሞ አገራዊ ምክክሩ የመግባቢያ ማዕቀፍና ተመራጭ አማካይ መንገድ እንዲፈጥር ለማድረግና ፤የኑሮ ውድነትን ለማቃለል ሁሉም አካላት ተቀናጅተው መንቀሳቀስ አለባቸው ሲሉም አፈ ጉባኤዋ ጥሪ አቅርበዋል።

የደቡብ ክልል ርዕሰ መስተዳድር አቶ እርስቱ ይርዳ በምክር ቤቱ ጉባኤ ላይ ባቀረቡት የ6 ወራት አፈጻጸም ሪፖርት  የሀገራችንን ሉኣላዊነት ለማስከበር ሁሉም የክልሉ ህዝቦች አኩሪ ተግባር መፈጸማቸውን አስታውቀዋል ።

የክልሉ የጸጥታ ሃይል ከመከላከያ ጎን ተሰልፎ የሀገር ሉኣላዊነት ማስከበር ግዳጁን በብቃት እየተወጣ መሆኑንም ጠቁመዋል።

የክልሉ ህዝብ ሀገሩን ከውጭና ከውስጥ ጠላቶች ለመጠበቅ ልጆቹን ግንባር ድረስ ከመላክ ባሻገር በአይነትና በጥሬ ገንዘብ ከ1 ነጥብ 4 ቢሊየን ብር በላይ ድጋፍ ማድረጉን ያስታወቁት ርዕሰ መስተዳድሩ የክልሉን ሰላምና ጸጥታ ለማስጠበቅና የግጭት አካባቢዎችን ወደ ሰላማዊ ሁኔታ ለመመለስ ከፍተኛ ጥረት መደረጉንም ተናግረዋል ።

በተለይም በእነዚህ አካባቢዎች የተካሄደ የሰላም ውይይቶችና ኮንፈረንሶች እንዲሁም የእርቀ ሰላም መድረኮች የተሻለ ሰላም ማምጣታቸውን አቶ እርስቱ ገልጸዋል ።

በየጊዜው ለሚፈጠሩ ግጭቶች ተጠያቂ የሆኑትን ህግ የማቅረብና አጥፊዎችን ተጠያቂ የማድረግ ስራዎች ውጤት እያመጡ መሆኑን ያነሱት ርዕሰ መስተዳድሩ ተፈናቃዮችን ወደ ቀያቸው የመመለሱ ተግባር ተጠናክሮ መቀጠሉም አስታውቀዋል ።

በሌላ በኩልም በክልሉ በያዝነው የበጋ ወቅት 204 ሺህ ሄክታር መሬት በመስኖ የለማ ሲሆን ÷ከዚህ ውስጥ 5 ሺህ 100 የሚሆነው ለመጀመሪያ ጊዜ የተካሄደው የበጋ መስኖ ስንዴ ልማት እንደሆነ በሪፖርታቸው አመልክተዋል ።

በክልሉ በቀጣዮቹ የበልግና መኸር ወቅት የግብርና ስራዎች  የኩታ ገጠም አሰራር፣የቴክኖሎጂ አጠቃቀምና የሜካናይዜችን አመራረትን ለማጎልበት በትኩረት እንደሚሰራም አስታውቀዋል ።

በልዩ ልዩ ረቂቅ አዋጆች ላይ በመምከር ማጽደቅ እንዲሁም ሹመት እና ረቂቅ ቃለ ጉባኤ ላይ በመምከር የምክር ቤቱ አባላት ውይይት ያደርጋሉ ተብሎ ይጠበቃል።

ጉባኤው ከዛሬ ጀምሮ ለ3 ተከታታይ ቀናት እንደሚካሄድ ተገልጿል።