በነገው ዕለት “ለመስቀሉ እሮጣለሁ” በሚል መሪቃል ይካሄዳል የተባለው ሩጫ ከሚመለከተው አካል ሕጋዊ እውቅና ያላገኘ ነው – የአዲስ አበባ ፖሊስ

ፖሊስ ባወጣው መግለጫ ነገ ሚያዚያ 2 ቀን 2014 ዓ.ም “ለመስቀሉ እሮጣለሁ” በሚል ምክንያት በአዲስ አበባ የጎዳና ላይ ሩጫ እንደሚካሄድ ሀሰተኛ መረጃ እየተሰራጨ ይገኛል ብሏል።

የሩጫ ውድድሩ ማሟላት የሚገባውን ሕጋዊ እውቅና ከሚመለከተው አካል ያላገኘ መሆኑንም አስታውቋል፡፡

ከዚህ ቀደም በመዲናዋ የተካሄዱ የጎዳና ላይ ሩጫዎች በተቀናጀ ሁኔታ በመመራታቸው ያለምንም የፀጥታ ችግር በሰላም መጠናቀቃቸውን ያስታወሰው ፖሊስ÷ የጎዳና ላይ ሩጫን ለማካሄድ የሚመለከታቸው አካላት ተሳትፎ እና ዝግጅት እጅግ አስፈላጊ በመሆኑ ከሚመለከተው አካል ህጋዊ የእውቅና ፈቃድ ማግኘት ግዴታ መሆኑን አጽንኦት ሰጥቷል፡፡

ይሁን እንጅ በድንገት የጎዳና ላይ ሩጫ ለማካሄድ የሚደረግ እንቅስቃሴ በከተማው የፀጥታ ሁኔታ ላይ አሉታዊ ተፅእኖ የሚፈጥር መሆኑን ህብረተሰቡም ሆነ ሩጫውን ያዘጋጁ አካላት ሊገነዘቡ ይገባልም ነው ያለው።

ሩጫው ይደረግበታል በተባለበት ቀን ቀድሞ የታቀዱ ሌሎች ተግባራትን ለማከናወን ፕሮግራም የተያዘ መሆኑን ያስታወቀው ፖሊስ÷ የፀጥታ ኃይሉ እና ሌሎች የሚመለከታቸው አካላት አስፈላጊውን ቅድመ ዝግጅት ሳያደርጉ በድንገት ሩጫ እናደርጋለን የሚሉ ወገኖች ከዚህ ድርጊታቸው እንዲታቀቡም አሳስቧል፡፡

የተዛባ መረጃ የሚያስተላልፉ አካላት ከህገ ወጥ ድርጊታቸው እንዲታቀቡ እና ይህንን መልዕክት በመተላለፍ ለሚፈጠር ማንኛውም ችግር ሩጫውን እናስተባብራለን የሚሉ አካለት በህግ እንደሚጠየቁም ነው ያስታወቀው።