ለውኃ እና ለአፈር አያያዝ አሠራሮቻችን ትኩረት ሰጥተን መሥራት አስፈላጊ ነው – ጠቅላይ ሚኒስትር ዐቢይ
አዲስ አበባ፣ ሚያዝያ 9፣ 2014 (ኤፍ ቢ ሲ) እንደ ሀገር ለውኃ እና ለአፈር አያያዝ አሠራሮቻችን ትኩረት ሰጥተን መሥራት አስፈላጊ ነው ሲሉ ጠቅላይ ሚኒስትር ዐቢይ አሕመድ ገለፁ፡፡
ጠቅላይ ሚኒስትር ዐቢይ በማህበራዊ ትስስር ገፃቸው የአፈርና ውኃ ጥምረት ለግብርና ምርታማነት ወሳኝ ነው ያሉ ሲሆን ÷ እንደ ሀገርም ለውኃ እና ለአፈር አያያዝ አሠራሮች ትኩረት ሰጥቶ መሥራት አስፈላጊ እንደሆነ አስፍረዋል፡፡
የአረንጓዴ ዐሻራ ጥረት የግብርና ምርታማነትን እና የምግብ ዋስትናን ለማረጋገጥ እንዲቻልም በርካታና ውስብስብ ችግሮችን ለመፍታት ያለመ ነው ሲሉ ተናግረዋል።
በዓለም በውኃ አቅርቦት ማነስና በአፈር መሸርሸር የተነሣ የመሬት መራቆት እየተባባሰ መምጣቱንም አንስተዋል በፅሁፋቸው፡፡
የአረንጓዴዐሻራ መርኃ ግብር አንዱ ዓላማው የአፈር መሸርሸርን በመቀነስ ፣የግብርናን ምርታማነት ማሻሻል ፣ በረሀማነትና መዘዞቹን መከላከል እና ግድቦችን በደለል ከመሞላት መታደግ መሆኑን ጠቅላይ ሚኒስትር ዐቢይ መናገራቸው ይታወሳል፡፡
በዚህም በአረንጓዴ ዐሻራ እንቅስቃሴ በተለያዩ የሀገሪቱ አካባቢዎች የአፈር መሸርሸርን በስኬታማነት ለማስቀረት መቻሉን አንስተዋል፡፡
እንዲሁም በተባበረ ክንድ ኢትዮጵያን ልምላሜ የማልበሱ ስራ ይቀጥላል ሲሉም መናገራቸው የሚታወስ ነው፡፡