Fana: At a Speed of Life!

በፍትሕ ሥርዓቱ ላይ የሚነሱትን ቅሬታዎች ለመመለስ የምርምር ሥራዎች የማይተካ ሚና አላቸው- ቋሚ ኮሚቴው

አዲስ አበባ፣ ሚያዝያ 11፣ 2014 (ኤፍ ቢ ሲ) በፍትሕ ሥርዓቱ ላይ የሚነሱትን የሕዝብ ቅሬታዎች ለመመለስ የፌዴራል የፍትሕ፣ የሕግ ምርምር እና ስልጠና ኢንስቲትዩት ሕግ ተኮር የምርምር ሥራዎች አይነተኛና የማይተካ ሚና እንዳላቸው የሕዝብ ተወካዮች ምክር ቤት የሕግ፣ ፍትሕ እና ዴሞክራሲ ጉዳዮች ቋሚ ኮሚቴ አመላከተ፡፡
ቋሚ ኮሚቴው በኢንስቲትዩቱ የመስክ ምልከታ ባደረገበት ወቅት የመስክ ምልከታው ቡድን ሰብሳቢው አቶ ለማ ተሰማ እንደገለጹት÷ በፍትሕ ሥርዓቱ ላይ የሚነሱትን የሕዝብ ቅሬታዎች ለመመለስ የኢንስቲትዩቱ የምርምር ሥራዎች አይነተኛና የማይተካ ሚና አላቸው፡፡
ተቋሙ እያካሄዳቸው ያሉትን የሕግ መዝገበ ቃላት ዝግጅት፣ በሕግ ትምህርት ቤቶች ወጥ ሥርዓተ ትምህርት ቀረፃ፣ የአዕምሮ ሕሙማን የህብረተሰብ ክፍሎችን ችግሮች የመፍታት የምርምር ሥራዎችን የመሳሰሉትን በጥንካሬ እንደሚታዩ ቋሚ ኮሚቴው ገልጿል፡፡
በፍርድ ቤቶች፣ በፖሊስ ጣቢያዎች፣ በዐቃቤ ሕጎች እና በማረሚያ ቤቶች የሚታየው የአገልግሎት ርካታ ክፍተት ለመሙላት በኢንስቲትዩቱ እየተሰሩ ያሉት የጥናት እና ምርምር ሥራዎችን ትኩረት በመስጠት ከግብ ማድረስ እንደሚገባም አሳስቧል፡፡
የኢንስቲትዩቱ ዋና ዳይሬክተር አምባሳደር ደግፌ ቡላ÷ የተቋሙ ሙያተኞች ከሌሎች የፍትሕ ተቋማት ጋር ተመሳሳይ ደመወዝ እና ጥቅማ ጥቅም ስለሌላቸው፣ ብቁ እና ተወዳዳሪ ባለሙያዎችን በተቋሙ ለማቆየት በመቸገራችን ቋሚ ኮሚቴው የበኩሉን እገዛ ሊያደርግልን ይገባል ብለዋል፡፡
የኢንስቲትዩቱ ጥናት እና ምርምር ምክትል ዋና ዳይሬክተር አቶ ምትኩ ማዳ÷ በሀገራችን በፍትሕ ተቋማት የሚስተዋሉትን ክፍተቶች ለመሙላት፣ ከተለያዩ ዩኒቨርሲቲዎች ጋር በቅንጅት በመሥራት፣ የፍትሕ ሥርዓቱን በምርምር እና በጥናት ለማገዝ በትኩረት እየተሠራ ነው ብለዋል፡፡
የኢንስቲትዩቱ የስልጠና ዘርፍ ምክትል ዋና ዳይሬክተር አቶ ዘካርያስ ኤርኮሌ÷ የተቋማትን የፍትሕ ፍላጎት መሠረት በማድረግ፣ ለመንግስት እና ለግል ተቋማት ሙያተኞችም ስልጠና በመስጠት እና ከባለድርሻ አካላት ጋር በቅንጅት በመሥራት የፍትሕ ዘርፉ በዕውቀት እና በክህሎት እንዲመራ ለማድረግ እየተሠራ ነው ማለታቸውን ከሕዝብ ተወካዮች ምክር ቤት ያገነነው መረጃ ያመላክታል፡፡
ኢትዮጵያን፦ እናልማ፣ እንገንባ፣ እንዘጋጅ!
ወቅታዊ፣ትኩስ እና የተሟሉ መረጃዎችን ለማግኘት፡-
ድረ ገጽ፦ https://www.fanabc.com/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡
ዘወትር፦ ከእኛ ጋር ስላሉ እናመሰግናለን!
You might also like

Leave A Reply

Your email address will not be published.