Fana: At a Speed of Life!

የአማራ ክልል በህልውና ዘመቻው የላቀ አስተዋፅኦ ላበረከቱ 2 ሺህ 197 የአማራ ክልል ፖሊስ አባላት እውቅና ሰጠ

 

አዲ አበባ፣ ግንቦት 2፣ 2014 (ኤፍ ቢ ሲ) የአማራ ብሔራዊ ክልላዊ መንግስት በሕግ ማስከበርና በህልውና ዘመቻው የላቀ አስተዋፅኦ ላበረከቱ 2 ሺህ 197 የአማራ ክልል ፖሊስ አባላት ከማዕረግ ዕድገት እስከ የምስክር ወረቀት እውቅና ሰጠ፡፡
የኢፌዴሪ ምክትል ጠቅላይ ሚኒስትር እና የውጭ ጉዳይ ሚኒስትር አቶ ደመቀ መኮንንን በተገኙበትና የክልሉ መንግሥት ባዘጋጀው በዚህ መርሐ ግብር ላይ ለመከላከያ ሰራዊት 3 ክፍለ ጦሮችና 12 ሻለቃዎች የዓይነት ሽልማት እንዲሁም እውቅና ጭምር ተሰጥቷል፡፡
የአማራ ብሔራዊ ክልላዊ መንግሥት “በሕግ ማስከበርና በህልውና ዘመቻው የተከፈለ መስዋእትነት ለኢትዮጵያ ሉዓላዊነት እና አንድነት” በሚል መሪ መልዕክት በህልውና ዘመቻው ተሳትፎ ላደረጉ የጸጥታ መዋቅር አካላት የእውቅና እና የምስጋና መርሐ ግብር እያካሄደ ነው፡፡
የእውቅና እና የምስጋና መርሐ ግብሩ ለሕዝቡ ሰላምና አንድነት ሲሉ መስዋዕትነት የከፈሉ ጀግኖች ይዘከሩበታል፡፡
በጀግንነት ተፋልመው ሕዝባቸውን ከአሸባሪው ትህነግ ወረራና የከፋ መከራ የታደጉ ጀግኖችም ለትውልዱ በፈጸሙት አኩሪ ገድል ሲዘከሩ ይኖራሉ ተብሏል፡፡
በእውቅናና ምስጋና መርሐ ግብሩ ላይ ÷ ምክትል ጠቅላይ ሚኒስትር እና የውጭ ጉዳይ ሚኒስትር አቶ ደመቀ መኮንንን ጨምሮ የአማራ ክልል ርዕሰ መስተዳደር ዶክተር ይልቃል ከፋለ፣ የጋምቤላ ክልል ርዕሰ መስተዳደር አቶ ኡመድ ኡጅሉ እና የሰላም ሚኒስትሩ አቶ ብናልፍ አንዷለም እንዲሁም የክልሉ ከፍተኛ አመራሮች ተገኝተዋል።
የላቀ አስተዋፅኦ ላበረከቱ አካላት ከፍተኛ ተጋድሎ ከፈፀሙ ቀበሌዎች ጀምሮ ከፍተኛ ጀብድ እስከፈፀሙ ክፍለ ጦሮች ነው እውቅናና ሽልማት የተሰጠው፡፡
የአማራ ክልል ፖሊስ ኮሚሽነር ተኮላ አይፎክሩ በመርሐ ግብሩ ባደረጉት ንግግር÷ ” ወራሪው ኃይል ጦርነትን እንደብቸኛ አማራጭ በመውሰድ፣ የጦርነት ነጋሪት በመጎሰም እና ወደተግባር በመቀየር በክልላችን ጭካኔ የተሞላበት ከፍተኛ የሆነ ቁሳዊና ሰብዓዊ ውድመት አድርሷል” ብለዋል ።
የጥፋት ኃይሉ እንቅስቃሴ ተቀልብሶ ሰላም የተገኘው÷ ” የክፉ ቀን ደራሽ፣ የአገር ባለውለታ እና ቆራጥ ጀግኖች ህይወትና አካል ተገብሮበት ነው” ብለዋል ።
የመከላከያ ሰራዊት፣ የፌደራል ፖሊስ፣ የአማራ ክልል የፀጥታ ኃይሎች ፣ የክልሉና የሀገሪቱ ባለሀብቶች ፣ የክልሉ ፖሊስ ልዩ ልዩ ክፍሎች የፋኖ አባላትና አመራሩ የክልሎች ልዩ ኃይል እና በሌሎች አካላት ቅንጅታዊ ተሳትፎ የህወሓትን ዓላማ ማክሸፍ መቻሉን ተናግረዋል፡፡
ኮሚሽነር ተኮላ የሽብር ቡድኑ ህወሓት ቀደም ሲል ከደረሰበት የኪሳራ ስሌቱ ሳይማር አሁንም ሌላ ጥፋትን ለመፈፀም እየተፍጨረጨረ መሆኑን ገልጸው÷ በዛሬው ዕለት ጀግኖች እና የጀግኖች ቤተሰቦች የተሸለሙት እና ክብር እንዲሰጣቸው የተደረገውም÷ የፀጥታ ኃይሉን እና ሕዝቡን የበለጠ ለማዘጋጀት ጭምር መሆኑን ኮሚሽነሩ ተናግረዋል።
በዚህም መሰረት÷ 31 ኮማንደሮች ወደ ረዳት ኮሚሽነርነት፣ 18 ምክትል ኮማንደሮች ወደ ኮማንደርነት፣ 22 ዋና ኢንስፔክተሮች ወደ ምክትል ኮማንደርነት፣ 297 ረዳት ኢንስፔክተሮች ወደ ዋና ኢንስፔክተር፣ 1 ሺህ 103 ረዳት ሳጅን ወደ ዋና ሳጅን፣ 269 በሜዳሊያ፣ 323 የደሞዝ እርከን ጭማሪ፣ 134 የምስጋና የምስክር ወረቀት ተበርክቶላቸዋል፡፡
በአጠቃላይ 1 ሺህ 471 በማዕረግ እድገት እና ቀሪዎቹ በእርከን፣ በሜዳሊያ እና በምስክር ወረቀት በድምሩ 2 ሺህ 197 የክልሉ ፖሊስ ኮሚሽን የሚመሩ ክፍሎች አባላት ተበረታትተዋል።
ከዚህ ባለፈም በህልውና ዘመቻው በቡድን (በክፍል) ደረጃ ጀብዱ በመፈፀም የላቀ አስተዋጽኦ ላበረከቱ 3 ክፍለጦሮች እና 12 ሻለቃ የአይነት ሽልማት፣ እዉቅናና ምስጋና ተሰጥቷል።
ፀጋዬ ወንድወሰን

 

You might also like

Leave A Reply

Your email address will not be published.