ህጋዊ የነዳጅ አቅርቦትና ስርጭትን በሚያስተጓጉሉ አካላት ላይ እርምጃ እንደሚወሰድ ተገለፀ

ያሳለፍነው ሚያዚያ ወር የትንሳኤ በዓል እና 1443ኛው የኢድ በዓል የተከበሩበት ወቅት በመሆኑ በእነዚህ በዓላት ምክንያት ነዳጅ ከጂቡቲ ወደብ ወደ አዲስ አበባ ባለመጫኑ በተፈጠረ ክፍተት ጊዜያዊ የነዳጅ እጥረት በመከሰቱ በየማደያዎቹ የተሽከርካሪዎች ሰልፍ መስተዋሉ ተገልጿል፡፡

የአቅርቦት ውስንነት፣ የቁጥጥር ስርዓቱ ድክመት፣ ከጅቡቲ አዲስ አበባ ባለው የነዳጅ ማጓጓዝ ሂደት የነዳጅ ቅሸባና የአሽከርካሪዎች በየቦታው ለረጅም ሠዓታት መቆም እንዲሁም መንግስት ከፈቀደው የግብይት ቦታና ዋጋ ውጪ የዋጋ ጭማሪ አድርጎ በህገ-ወጥ መልኩ የመሸጥ ፍላጎት የነዳጅ አቅርቦትና ሥርጭቱን እየፈተኑት ያሉ ችግሮች መሆናቸውም ተብራርቷል፡፡

ችግሮቹን በመፍታት ምርቱን ለተጠቃሚው ለማድረስ አሰራርን ከማስተካከል ጀምሮ መንግስት ከዘረጋው የነዳጅ አቅርቦትና ስርጭት ሂደት ውጭ በሚፈጽሙ አካላት ላይ አስተዳደራዊና ህጋዊ እርምጃ ይወሰዳልም ተብሏል፡፡

በአጭር ጊዜ ውስጥ ተጨማሪ ጥናቶችን በማካሄድ በነዳጅ አቅርቦት፣ ሥርጭትና ቁጥጥር ሂደት ያሉ ችግሮችን በዘላቂነት ለመፍታት ከስምምነት በላይ መደረሱንም ከንግድና ቀጣናዊ ትስስር ሚኒስቴር ያገኘነው መረጃ ያመላክታል፡፡