የኢትዮ-ቱርክ የኢንቨስትመንት ፎረም በቱርክ ተካሄደ

የአዳና ከተማ የንግድ ምክር ቤት ፕሬዚዳንት አቲላ ሜኔቭስ መሰል ፎረም ከኤምባሲው ጋር በጋራ መዘጋጀቱ በሁለቱ ሀገራት መካከል ያለውን የንግድ እና ኢንቨስትመንት ግንኙነትን የበለጠ ለማሳደግ እንደሚረዳ ተናግረዋል።

በአዳና የኢትዮጵያ የክብር ቆንስል ዩሱፍ ካን ÷ በሁለቱ ሀገሮች መካከል ያለውን የንግድ እና ኢንቨስትመንት ሁኔታ ለማጠናከር እንደሚሰሩ ነው የገለጹት::

በቱርክ የኢትዮጵያ ባለሙሉ ስልጣን አምባሳደር አደም መሀመድ ባደረጉት ንግግር፥ የሁለቱ ሀገራት መሪዎች በኢንቨስትመንት፣ በንግድና በፖለቲካ ዘርፎች በጋራ ለመስራት መስማማታቸውን በመግለጽ ስምምነቶቹን ወደ ተግባር ለመቀየር በትብብር መስራት እንደሚገባ ጠቁመዋል፡፡

በተጨማሪም የኢትዮጵያን የንግድ እና የኢንቨስትመንት ምቹ አማራጮችን እንዲጠቀሙ ለቱርክ ባለሃብቶች ጥሪ አቅርበዋል።

የኢንቨስትመንት ኮሚሽን ኮሚሽነር ሌሊሴ ኔሜ በበኩላቸው÷ በኢትዮጵያ ስላለው ምቹ የኢንቨስትመንት ሁኔታ፣ ስለተደረጉ የኢንቨስትመንት ማሻሻያዎች፣ የትኩረት መስኮች ፣ ያሉ ማበረታቻዎች እና እድሎች አስረድተዋል::

በኢትዮጵያ መዋዕለ ንዋያቸውን ለማፍሰስ ለሚፈልጉ የቱርክ ባለሀብቶች ሁሉ ፅ/ቤታቸው አስፈላጊውን ድጋፍ እንደሚያደርግ መግለፃቸውን ከአንካራ የኢትዮጵያ ኤንባሲ ያገኘነው መረጃ ያመላክታል፡፡