Fana: At a Speed of Life!

በምዕራብ ጎጃም ዞን ከ595 በላይ ተጠርጣሪዎች ለሕግ መቅረባቸው ተገለጸ

አዲስ አበባ፣ ግንቦት 19፣ 2014 (ኤፍ ቢ ሲ) እየተወሰደ ባለው ሕግ የማስከበር እርምጃ 595 ተጠርጣሪዎችን ለሕግ ማቅረቡን የምዕራብ ጎጃም ዞን አስተዳደር አስታወቀ።

የምዕራብ ጎጃም ዞን ዋና አስተዳዳሪ አቶ መልካሙ ተሾመ በሰጡት መግለጫ ÷ በዞኑ በልዩ ልዩ መልክ የሚገለጹ የፀጥታ ችግሮችና የሰላምና ደህንነት መስተጓጉሎች አጋጥሞ መቆየቱን ተናግረዋል።

ግድያ፣ መኪና አስቁሞ ዘረፋ፣ ልዩ ልዩ ስርቆት፣ ህገ ወጥ ጥይት ተኩስ፣ የጦር መሳሪያ ንግድ፣ ኮንትሮባንድ እና የመሳሰሉት የወንጀል ድርጊቶች በመበራከታቸው የሕዝቡ ሰላምና ደህንነት አደጋ ውስጥ ቆይቷል ብለዋል።

ሀገራዊ አንድነትን ለማምጣትና የሕዝቡን ሰላምና ደህንነት ለማስጠበቅ እንደ ሀገር በተቀመጠው አቅጣጫ መሰረት አሁን ላይ በዞኑ በሁሉም አካባቢዎች ሕግ የማስከበር ተግባር እየተከናወነ መሆኑን ገልጸዋል።

ሕግ የማስከበር ተግባሩ በሕዝቡ ፍላጎትና አጋዥነት እየተከናወነ ይገኛል ያሉት ዋና አስተዳዳሪው እየተከናወነ ባለው ሕግ የማስከበር ተግባር 595 ተጠርጣሪዎችን በቁጥጥር ስር በማዋል ምርመራ መጀመሩን ተናግረዋል።

የሕዝቡን መሰረታዊ የልማት ጥያቄዎች ለመመለስ የተጀመረው የሕግ ማስከበር ተግባሩ በአጭር ጊዜ እንዲጠናቀቅ ሕዝቡ ለሰላም ማስከበሩ እያደረገ ያለውን አጋርነት አሁንም አጠናክሮ እንዲቀጥል ዋና አስተዳዳሪው ጥሪ አቅርበዋል ሲል አሚኮ ዘግቧል።

You might also like

Leave A Reply

Your email address will not be published.