Fana: At a Speed of Life!

በኦሮሚያ ድርቅ በተከሰተባቸው አካባቢዎች 700 ሺህ ተማሪዎች የምገባ መርሐ ግብር እየተካሄደ ነው

አዲስ አበባ፣ ግንቦት 20፣ (ኤፍ ቢ ሲ) በኦሮሚያ ክልል ድርቅ በተከሰተባቸው አካባዎች ለሚገኙ 700 ሺህ ተማሪዎች የምገባ መርሐ ግብር እየተካሄደ መሆኑን የክልሉ ትምህርት ቢሮ አስታወቀ።

የኦሮሚያ ክልል የክረምት የዜግነት አገልግሎት ማስጀመሪያና የ2015 ዓ.ም የክልሉ የትምህርት ዘርፍ እቅድ ላይ ያተኮረ ውይይት በአዳማ ከተማ እየተካሄደ ነው።

በኦሮሚያ ክልል የቦረናና የምስራቅ ጉጂ እንዲሁም የሐረርጌና የባሌ ቆላማ አካባቢዎች በድርቁ መጠቃታቸውን የአደጋ ስጋት አመራር ኮሚሽን መረጃ ያመለክታል።

ድርቁ በተከሰተባቸው አካባቢዎች በሚገኙ 700 ሺህ ተማሪዎች ምገባ እየተካሄደ መሆኑን የክልሉ የትምህርት ቢሮ ኃላፊ ዶክተር ቶላ በሪሶ ገልጸው ፥ በክልሉ አርብቶ አደር አካባቢዎች ተወስኖ ያለውን የምገባ መርሐ ግብር በሁሉም ዞኖች ለማስፋት መታቀዱን አመላክተዋል፡፡

በ2015 ዓ.ም የ7 ነጥብ 5 ሚሊየን ተማሪዎች ምገባ ለማካሄድ ዝግጅት እየተደረገ መሆኑንም ነው የገለጹት።

ለዚህም የ“ቡሳ ጎኖፋ” ተቋም መደራጀቱን ጠቁመው ፥ በመርሐ ግብሩ የተካተቱት የቅድመ መደበኛና መደበኛ ተማሪዎች መሆናቸውን አመልክተዋል።

“ተማሪዎች ስለ ምግብ እያሰቡ የሚፈለገውን የትምህርት ጥራት ማስጠበቅ አይቻልም” ያሉት የትምህርት ቢሮ ኃላፊው ፥ የምግብ ተማሪዎች የምገባ አቅምን ማሳደግ አስፈላጊ መሆኑን መግለጻቸውን ኢዜአ ዘግቧል።

በተያያዘም ከ3ሺህ በላይ የቅድመ መደበኛ ትምህርት ቤቶችና ከ140 በላይ የሁለተኛ ደረጃ ትምህርት ቤቶችና ሰባት አዳሪ ትምህርት ቤቶች ግንባታቸው ተጠናቆ ስራ መጀመራቸውን ጠቁመዋል።

በኦሮሚያ ክልል በቅድመ መደበኛ እስከ ሁለተኛ ደረጃ ትምህርት ቤቶች ከ10 ሚሊየን በላይ ተማሪዎች እየተማሩ እንደሚገኝ ከክልሉ ትምህርት ቢሮ የተገኘው መረጃ ያመለክታል።

You might also like

Leave A Reply

Your email address will not be published.