Fana: At a Speed of Life!

በቤኒሻንጉል በ23 ሚሊየን ብር የተገነባው የመጠጥ ውኃ ፕሮጀክት ተመረቀ

አዲሰ አበባ፣ ነሐሴ 3፣ 2014 (ኤፍ ቢ ሲ) የቤኒሻንጉል ክልል ርዕሰ መስተዳድር አቶ አሻድሊ ሀሰን በአሶሳ ዞን ቡልድግሉ ወረዳ ከ23 ሚሊየን ብር በላይ የተገነባውን የቡልድግሉ ከተማ ንጹህ መጠጥ ውኃ ኘሮጀክት መርቀው ከፈቱ።

በኘሮጀክቱ ምረቃ ላይ የክልሉን ርዕሰ መስተዳድር አቶ አሻድሊ ሀሰን፣ ምክትል ርዕሰ መስተዳድር አቶ ጌታሁን አብዲሳ፣ የክልሉ ብልጽግና ፓርቲ ጽ/ቤት ኃላፊ አቶ ኢስሃቅ አብዱልቃድር፣ የክልሉ ምክር ቤት ምክትል አፈ ጉባኤ ወ/ሮ አለምነሽ ይባስ እንዲሁም ሌሎች የፌዴራልና የክልል ከፍተኛ አመራሮች ተገኝተዋል።

ርዕሰ መስተዳድር አቶ አሻድሊ ሀሰን ፥ የክልሉ መንግስት ለህብረተሰቡ የንጹህ መጠጥ ውኃ ለማዳረስ ከሚመለከታቸው አካላት ጋር ትኩረት ሰጥቶ እየሠራ መሆኑን ገልጸዋል።

ህብረተሰቡ ከመንግስት ጋር ባደረገው ርብርብ የቡልድግሉ ወረዳን ጨምሮ ሠላምን ለማወክ ሲንቀሳቀሱ የነበሩ ጸረ-ሠላም ኃይሎችን ዓላማ ማክሸፍ መቻሉን ጠቁመው፥ በቀጣይም የጠላትን ዓላማ እያከሸፍን በተለያዩ አካባቢዎች የተጀመሩ ፕሮጀክቶች ማጠናቀቅ ይጠበቅብናል ብለዋል።

በቡልድግሉ ወረዳ የተቋረጠውን የኔትወርክ አገልግሎት ጥገና በማድረግ በአጭር ጊዜ ለማስጀመር ከኦሮሚያ ክልል መንግስትና ከኢትዮ ቴሌኮም ጋር በጋራ እየተሠራ መሆኑን አቶ አሻድሊ ገልጸዋል።

በተጨማሪም በቡልድግሉ ወረዳ ጎደሬ ማዕከል የዘመናት ጥያቄ የነበረውን የኔትወርክ ጥያቄ ለመመለስ ከ2015 አዲስ ዓመት በፊት ተገንብቶ የሚጠናቀቅ የታወር ግንባታ መጀመሩንም ነው ርዕሰ መስተዳድሩ የተናገሩት።

የክልሉ ውኃ፣ መስኖና ኢነርጂ ሀብት ልማት ቢሮ ምክትል ኃላፊ አቶ ሙፍቲ መርቀኒ ፥ ኘሮጀክቱ ለከተማውና በአካባቢው ለሚገኙ ከ10 ሺህ በላይ ለሚሆኑ የህብረተሰብ ክፍሎች ለ20 ዓመታት ዘላቂ አገልግሎት እንዲሰጥ ተደርጎ የተገነባ ነው ብለዋል።

የክልሉ መንግስት የልማት ድርጅት በሆነው ቤጉ ዴቭሎፐመንት ግሩፕ ኮንስትራክሽን ዘርፍ ግንባታው የተከናወነው ኘሮጀክቱ ከ23 ሚሊየን 200 ሺህ ብር በላይ ወጪ እንደተደረገበትም ገልጸዋል።

በተጨማሪ በቡልድግሉ ወረዳ ዳሬዛሃብ ከተማ በ37 ነጥብ 3 ሚሊየን ብር የንጹህ መጠጥ ውኃ ፕሮጀክት በማስገንባት ላይ አንደሚገኝም ምክትል ኃላፊው ተናግረዋል።

የቡልድግሉ ወረዳ ዋና አስተዳደር አቶ በክሪ አብዱላሂ፣ የከተማው ሕዝብ እየጨመረ መምጣቱን ተከትሎ የዘመናት ጥያቄ የነበረው የንጹህ መጠጥ ውኃ ጥያቄ በመመለሱ መደሠታቸውን ገልጸዋል።

የወረዳው ህዝብ ሠላምን የሚያውኩ አካላትን አጥብቆ በመታገል መንግስት የሚያከናውናቸውን የልማት ስራዎች በሙሉ አቅሙ እንዲደግፍ አቶ በክሪ ጥሪ ማቅረባቸውን ከክልሉ መንግስት ኮሙኒኬሽን ያገኘነው መረጃ ያመለክታል፡፡

በተመሳሳይ በቡልድግሉ ወረዳ በ5 ነጥብ 8 ሚሊየን ብር የተጠናቀቀ የጽ/ቤት ግንባታን ተመርቆ ለአገልግሎት ክፍት ሆኗል፡፡

ወቅታዊ፣ ትኩስ እና የተሟሉ መረጃዎችን ለማግኘት፡-
ድረ ገጽ፦ https://www.fanabc.com/
ፌስቡክ፡- https://www.facebook.com/fanabroadcasting
ዩትዩብ፦ https://www.youtube.com/c/fanabroadcastingcorporate/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡

ዘወትር ከእኛ ጋር ስላሉ እናመሰግናለን!

You might also like

Leave A Reply

Your email address will not be published.