Fana: At a Speed of Life!

ሀገርን ለመረከብ ወጣቶች ግብ ሊኖራቸው ያስፈልጋል – ጠ/ሚ ዐቢይ አሕመድ

 

አዲስ አበባ፣ ነሐሴ 15፣ 2014 (ኤፍ ቢ ሲ) ሀገርን ለመረከብ ወጣቶች ግብ ሊኖራቸው ያስፈልጋል ሲሉ ጠቅላይ ሚኒስትር ዐቢይ አሕመድ ገለጹ፡፡

ጠቅላይ ሚኒስትር ዐቢይ ዛሬ ጠዋት “የኛ ዘመን ወጣት ሚና’ በሚል ርዕስ በተካሄደው ሀገር አቀፍ የወጣቶች መድረክ ማጠቃለያ ከወጣቶች ጋር ቆይታ አድርገዋል።

ጠቅላይ ሚኒስትሩ ከወጣቶቹ ለቀረቡላቸው ጥያቄዎችም ምላሽ ሰጥተዋል።

ኢትዮጵያ በተግዳሮቶች ብትደክምም፣ እንደ ንሥር ሀይሏን አድሳ ወደ ቀደመ ከፍታዋ እንድትመለስ፣ የዝቅታ ጉዞ መንስኤዎችን ለይቶ ማስተካከል እንደሚያስፈልግና ለዚህም የወጣቶች ሚና ከፍተኛ እንደሆነ ነው የገለጹት ።

ጠቅላይ ሚኒስትር ዐቢይ ወጣቶች የነገ ተስፋቸውን ሊያጨልሙ የሚፈልጉ አካላትን ፈጽሞ እንዳይፈቅዱላቸው ለኅብረ ብሔራዊ አንድነት እንዲተጉ፣ ሀገርን ለመረከብ እንዲዘጋጁ ጥሪ አቅርበዋል።

በአሉታዊ ነገር ከመጠመድ ይልቅ አዎንታዊውን በመሻት ብልጽግና ሰላምና አንድነት ሊፈልጉ ይገባል ብለዋል፡፡

በመካሄድ ላይ የሚገኙ የልማት ፕሮጀክቶች ሁሉ የነገ ተስፋ ለሆኑት ለወጣቶች እንዲሆኑ ታቅዶ የሚሠሩ መሆኑንም ተናግረዋል።

ሀገርን ለመረከብ ወጣቶች ግብ ሊኖራቸው እንደሚያስፈልግ ያነሱት ጠቅላይ ሚኒስትሩ፥ ከሰፈር ይልቅ ሀገርን፣ ደግሞም አህጉርና ዓለምን ለመምራት መነሳሳት ያስፈልጋል ነው ያሉት።

የሀሳብ ልዕልናን የሚያስበልጥ የመደመር ትውልድ ሊሆኑ እንደሚገባም አስገንዝበዋል።

በክልሎች የሚከናወኑ የልማት ሥራዎች ተስፋፍተው የሚቀጥሉ መሆኑን እና የመልካም አስተዳደር ሳንካ የሆነውን ሌብነትን ለመቅረፍ ሥራዎች ተጠናክረው እንደ ተጀመሩም አስታውቀዋል።

አያይዘውም ወጣቶች የነገ ሀገር ተረካቢ እንደ መሆናቸው፣ ልባቸውን እና እጃቸውን ንጹህ እንዲያደርጉም ጥሪ ማቅረባቸውን ከጠቅላይ ሚኒስቴር ጽህፈት ቤት ያገኘነው መረጃ ያመላክታል።

ባለፉት አራት ዓመታት ገለልተኛ ተቋማትን ከመገንባት፣ ዴሞክራሲያዊ ተቋማትን ከማጠናከር፣ የልማት ሥራዎችን ከመከወን፣ የአስተዳደር ክልሎችን ከመወሰን አንጻር የተሰሩ ሥራዎችን በማንሳት ለዚህ የስኬት ጉዞ ወጣቱ የትግሉ አንድ አካል መሆኑንም አስታውሰዋል።

You might also like

Leave A Reply

Your email address will not be published.