Fana: At a Speed of Life!

ኢትዮጵያውያን በአዲሱ ዓመት ለሰላም፣ እርቅና ይቅርታ ቅድሚያ ሰጥተው እንዲሰሩ የሃይማኖት አባቶች ጥሪ አቀረቡ

አዲስ አበባ ፣ ጳጉሜን 5 ፣ 2014 (ኤፍ ቢ ሲ) ኢትዮጵያውያን በአዲሱ ዓመት ለሰላም፣ እርቅና ይቅርታ ቅድሚያ ሰጥተው እንዲሰሩ የሃይማኖት አባቶች ጥሪ አቀረቡ፡፡

የክርስትና ሃይማኖት ተቋማት አዲሱን ዓመት ምክንያት በማድረግ የእንኳን አደረሳችሁ መልዕክት አስተላልፈዋል፡፡

የሃይማኖት አባቶቹ በመልዕክታቸው÷ በአዲስ ዓመት ለራሳችን እንዲደረግብን የማንፈልገውን በሌሎች ላይ ባለማድረግ ለሰላምና እርቅ መስራት ይገባል ብለዋል።

አዲሱ ዓመት የአንድነት፣ የይቅርታና የምህረት ሰላም የሰፈነበት ዘመን እንዲሆን መልካም ምኞታቸውን ገልጸዋል፡፡

አዲሱን ዓመት ስናከብር የተቸገሩትን በመርዳት መሆን እንዳለበትም አስገንዝበዋል።

የኢትዮጵያ ኦርቶዶክስ ተዋህዶ ቤተክርስቲያን ፓትርያርክ ብፁዕ ወቅድስ አቡነ ማቲያስ÷ አዲሱ ዓመት የሰላምና የአንድነት እንዲሆን ተመኝተዋል።

የኢትዮጵያ ካቶሊካዊት ቤተ ክርስቲያን ሊቀ ጳጳስ ብጹዕ ካርዲናል ብርሃነ ኢየሱስ በበኩላቸው÷ አዲሱ ዓመት ለምስጋናና ለንስሃ የምንተጋበት፣ ከስሜታዊነት ይልቅ አዕምሯዊ ስክነትን የምንመርጥበት መሆን አለበት ነው ያሉት።

በኢትዮጵያ ዘላቂ ሰላም ለማስፈን ሁሉም ወገኖች ለዕርቅና ለውይይት ዝግጁ እንዲሆኑም ነው ጥሪ ያቀረቡት።

የኢትዮጵያ ወንጌል አማኞች አብያተ ክርስቲያናት ምክር ቤት ጠቅላይ ጸሐፊ ቄስ ደረጀ ጀምበሩ÷ አዲሱ ዓመት ከእርስ በርስ መፈራረጅ በመራቅ በቅን ልቦና ለጋራ ዕድገትና ሰላም የምንተጋበት ሊሆን እንደሚገባ አሳስበዋል።

ከተዛቡ መረጃዎች መራቅ በአዲሱ ዓመት አዲስ አስተሳስብ ሰንቅን ልንራመድ ይገባል ማለታቸውን ኢዜአ ዘግቧል፡፡

You might also like

Leave A Reply

Your email address will not be published.