Fana: At a Speed of Life!

አዲስ አበባ ዩኒቨርሲቲ እና የቻይና ኤምባሲ የነጻ ትምህርት እድል ስምምነት ተፈራረሙ

አዲስ አበባ፣ መስከረም 4 ፣2014 (ኤፍ ቢ ሲ) በቴክኖሎጂው ዘርፍ የተማሪዎችንና የመምህራንን አቅም የሚያሳድግ የነጻ የትምህርት እድል ስምምነት በአዲስ አበባ ዩኒቨርሲቲ እና በቻይና ኤምባሲ መካከል ተፈረመ፡፡

ስምምነቱ የኢትዮጵያን እና የቻይናን የቆየ ወዳጅነት እንደሚያጠናክር ተገልጿል፡፡

ስምምነቱን የአዲስ አበባ ዩኒቨርሲቲ የአካዳሚክ ምክትል ፕሬዚዳንት ዶክተር እመቤት ሙሉጌታ እና በኢትዮጵያ የቻይና ኤምባሲ ምክትል አምባሳደር ሼን ቂንሚን ተፈራርመውታል።

ምክትል አምባሳደሩ የነጻ የትምህርት እድሉ የተመቻቸው በቻይና መንግስት መሆኑን ገልጸው ፥ ይህም የሁለቱን ሀገራት ታሪካዊ ግንኙነት ወደ ተሻለ ደረጃ ያሳድገዋል ብለዋል፡፡

የነጻ የትምህርት እድሉ በአዲስ አበባ ዩኒቨርሲቲ የሚገኙ የቴክኖሎጂ ተማሪዎችና መምህራን ላላቸው እምቅ አቅም እውቅና ለመስጠትና የበለጠ እንዲያዳብሩት ለማስቻል ያለመ መሆኑንም ተናግረዋል፡፡

የአዲስ አበባ ዩኒቨርሲቲ የአካዳሚክ ምክትል ፕሬዚዳንት ዶክተር እመቤት ሙሉጌታ በበኩላቸው ፥ የትምህርት እድሉ የአዲስ አበባ ዩኒቨርሲቲ ተማሪዎችና መምህራን ትርጉም ያለውና ለህብረተሰቡ ጠቀሜታ ያላቸው በቴክኖሎጂ የተደገፉ የጥናትና ምርምር ውጤቶችን እንዲያገኙ ያስችላል ብለዋል፡፡

ስምምነቱ መማር ላልቻሉ ተማሪዎች ድጋፍ በማድረግ ትምህርታቸውን እንዲቀጥሉና ህልማቸውን እውን እንዲያደርጉ ማስቻልም ሌላኛው ዓላማው መሆኑን መግለጻቸውን ኢዜአ ዘግቧል፡፡

ወቅታዊ፣ትኩስ እና የተሟሉ መረጃዎችን ለማግኘት፡-
ድረ ገጽ፦ https://www.fanabc.com/
ፌስቡክ፡- https://www.facebook.com/fanabroadcasting
ዩትዩብ፦ https://www.youtube.com/c/fanabroadcastingcorporate/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡

ዘወትር፦ ከእኛ ጋር ስላሉ እናመሰግናለን!

You might also like

Leave A Reply

Your email address will not be published.