Fana: At a Speed of Life!

የፎረም ኦፍ ፌዴሬሽንስ ፕሬዚዳንት ለይፋዊ የሥራ ጉብኝት አዲስ አበባ ገቡ

አዲስ አበባ፣ መስከረም 9፣ 2015 (ኤፍ ቢ ሲ) የፎረም ኦፍ ፌዴሬሽንስ ፕሬዚዳንት  ሩፓክ ቻቶፓዲሂያይ ለሦስት ቀናት  ይፋዊ የሥራ ጉብኝት አዲስ አበባ ገብተዋል፡፡

ፕሬዚዳንቱ በቆይታቸው÷ ከሰላም ሚኒስቴር፣ ከፌዴራል ጠቅላይ ፍርድ ቤት፣ ከብሔራዊ ምክክር ኮሚሽን አመራሮች እንዲሁም ከተለያዩ የፖለቲካ ፓርቲ ተወካዮችና የሚዲያ ተቋማት አመራሮች ጋር ይወያያሉ ተብሎም ይጠበቃል፡፡

ከዚህ በተጨማሪ መቀመጫቸውን በኢትዮጵያ ያደረጉ ዓለም አቀፍ ተቋማትን እንደሚጎበኙ ነው የተጠቆመው፡፡

የፎረም ኦፍ ፌዴሬሽንስ ፕሬዚዳንት ጉብኝት ዋና ዓላማ ፎረሙ በቀጣይ በኢትዮጵያ ሊያተኩርባቸው የሚገቡ ጉዳዮች ላይ ከፌዴሬሽን ምክር ቤትና ሌሎች አካላት ጋር ለመወያየት እንደሆነ ተገልጿል፡፡

ፎረም ኦፍ ፌዴሬሽንስ ዋና መቀመጫውን በካናዳ ያደረገ ዓለም አቀፍ መንግሥታዊ ያልሆነ ድርጅትና የፌዴራል ሥርዓት የሚከተሉ ሀገራት ጥምረት ሲሆን÷ ኢትዮጵያም በፈረንጆቹ ከ2006 ጀምሮ የፎረሙ አባልና አጋር በመሆን እየተሳተፈች ትገኛለች፡፡

በዛሬው ዕለትም ፕሬዚዳንቱ  ከፌዴሬሽን ምክር ቤት አፈ ጉባዔ  አቶ አገኘሁ ተሻገር ጋር ፎረሙ ኢትዮጵያ ውስጥ እያከናወነ ስላላቸው ተግባራትና ወደፊት በኢትዮጵያ ስለሚከውናቸው ስራዎች ላይ ውይይት አድርገዋል፡፡

በተመሳሳይ ከህዝብ ተወካዮች ምክር ቤት አፈ ጉባዔ አቶ ታገሠ ጫፎ ጋርም ውይይት ማድረጋቸው ከምክር ቤቱ ያገኘነው መረጃ ያመላክታል።

You might also like

Leave A Reply

Your email address will not be published.