ኢትዮጵያ እና ሶማሊያ የሀገራቱን የሁለትዮሽ ትስስር እና ግንኙነት ለማጠናከር ተስማሙ

አዲስ አበባ ፣ መስከረም 20 ፣ 2015 (ኤፍ ቢ ሲ) ኢትዮጵያ እና ሶማሊያ የሀገራቱን የሁለትዮሽ ትስስር እና ግንኙነት ለማጠናከር ተስማሙ።

የሶማሊያው ፕሬዚዳንት ሀሰን ሼክ ሞሃሙድ በኢትዮጵያ የነበራቸውን የሁለት ቀናት የሥራ ጉብኝት ማጠናቀቃቸውን ተከትሎ የጠቅላይ ሚኒስትር ፅህፈት ቤት የሁለቱ ሀገራት መሪዎች የጋራ ስምምነትን ይፋ አድርጓል።

ፕሬዚዳንቱ በቆይታቸው ከጠቅላይ ሚኒስትር ዐቢይ አሕመድ ጋር ከሀገራቱ ከተውጣጣ ከፍተኛ የልዑካን ቡድን ጋር ተወያይተዋል።

መሪዎቹ በትብብር ሊሰሩባቸው በሚችሉባቸው የጋራ ጉዳዮች ላይ ስምምነት ማድረጋቸውን እንዲሁም የሽብርተኝነት እና የፅንፈኝነት ስጋትን ለማጥፋት እና በሁለትዮሽ የኢኮኖሚ ትብብር ጉዳዮች ዙሪያ ተቀራርቦ ለመስራት መስማማታቸው ተገልጿል።

ከዚህ ባለፈም የሀገራቱን የግዛት አንድነት እና ሉዓላዊነት ባከበረ መልኩ የሁለቱን ሀገራት እና ህዝቦች ትስስር እና የሁለትዮሽ ግንኙነት ለማጠናከር መስማማታቸው ተጠቅሷል።

በውይይታቸው ለሶማሊያ ሰላም፣ መረጋጋት እና ሀገር ግንባታ መስዋዕትነት ለከፈለው የኢፌዴሪ መከላከያ ሰራዊት ያላቸውን አድናቆትና ክብርም ገልጸዋል።