Fana: At a Speed of Life!

የኢትዮጵያ ጠላቶች ዓላማ የሀገሪቱን ኢኮኖሚ ማዳከም መሆኑን አቶ ርስቱ ይርዳ ተናገሩ

አዲስ አበባ፣ መስከረም 24፣ 2015 (ኤፍ ቢ ሲ) ኢትዮጵያን ሊጎዱ የሚሹ ኃይሎች ሁሉ ዋና ዓላማ የሀገሪቱን ኢኮኖሚ ማዳከም ነው ሲሉ የደቡብ ክልል ርዕሰ መስተዳድር ርስቱ ይርዳ ተናገሩ፡፡

የበጋ መስኖ ስንዴ ልማት የንቅናቄ መድረክ፥ የፌዴራልና የክልል ከፍተኛ አመራሮች እንዲሁም ተጋባዥ እንግዶች በተገኙበት በቡታጅራ ከተማ እየተካሄደ ነው፡፡

አቶ ርስቱ በመድረኩ ላይ ባደረጉት ንግግር÷ ኢትዮጵያን ሊጎዱ የሚሹ ኃይሎች ሁሉ ዋና ዓላማ የሀገሪቱን ኢኮኖሚ ማዳከም በመሆኑ ዓላማቸው እንዳይሳካ ለማድረግና ጫናውን ለመቋቋም ከድኅነት ሊያወጣ የሚችል ሥራ መተግበር ይገባል ብለዋል፡፡

ለዚህም መንግሥት በተግባር ለውጥ የሚያመጣ ፅኑ አቋም ይዞ እየሠራ ይገኛል ነው ያሉት፡፡

የኢኮኖሚው መሰረት ግብርና ቁልፍ ጉዳይ መሆኑም መታወቅ አለበት ሲሉ አስገንዝበዋል፡፡
የክልሉ ግብርና ቢሮ ኃላፊ ኡስማን ሱሩር በበኩላቸው÷ የበጋ መስኖ ስንዴ ልማትን ለሁለተኛ ጊዜ ለማሳካት ርብርብ ማድረግ ይገባል ብለዋል፡፡

የስንዴ ልማት ላይ በቅንጅት በመሥራት ኢትዮጵያ ባለፉት ዓመታት ከውጭ ስታስገባ የነበረውን የስንዴ ምርት በሀገር ውስጥ አምርተን ለመተካት ብቻ ሳይሆን÷ ለውጭ ሀገራት ለመላክ የተያዘውን ዕቅድ ማሳካት አለብን ነው ያሉት፡፡

በዘንድሮ በጀት ዓመት የበጋ መስኖ ስንዴ ልማት ከ22 ሺህ ሔክታር በላይ በማልማት ከ748 ሺህ ኩንታል በላይ ምርት ለማምረት መታቀዱም ተገልጿል፡፡

እቅዱን ለማሳካትም÷ የቅድመ ዝግጅት ሥራ ማከናወን፣ የልየታና የንቅናቄ ሥራዎችን ማጠናከር፣ አስፈላጊ የድጋፍና የክትትል ተግባራትን ማከናወን እንደሚገባ አሳስበዋል፡፡

በክልሉ የተከናወኑ የስንዴ ልማት ሥራዎችና ተሞክሮዎች በመድረኩ ላይ ለውይይት ቀርበዋል፡፡

በብርሃኑ በጋሻው

ወቅታዊ፣ትኩስ እና የተሟሉ መረጃዎችን ለማግኘት፡-
ድረ ገጽ፦ https://www.fanabc.com/
ፌስቡክ፡- https://www.facebook.com/fanabroadcasting
ዩትዩብ፦ https://www.youtube.com/c/fanabroadcastingcorporate/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡

ዘወትር፦ ከእኛ ጋር ስላሉ እናመሰግናለን!

 

You might also like

Leave A Reply

Your email address will not be published.