አዲስ አበባ፣ መስከረም 29፣ 2015 (ኤፍ ቢ ሲ) በኢትዮጵያ አስተናጋጅነት እየተካሄደ በሚገኘው የምስራቅና መካከለኛው አፍሪካ የእግር ኳስ ማህበራት (ሴካፋ) ደቡብ ሱዳን ወደ ግማሽ ፍጻሜ ማለፏን አረጋግጣለች።
በአበበ ቢቂላ ስታዲየም እየተከናወነ የሚገኘውና ሰባተኛ ቀኑን በያዘው ውድድር ÷ ዛሬ የምድብ የመጨረሻ ጨዋታዎች ተካሄደዋል።
በምድብ ሁለት ደቡብ ሱዳንና ብሩንዲ ያደረጉት ጨዋታ 1 ለ 1 ተጠናቋል።
ውጤቱንም ተከትሎ ደቡብ ሱዳን ከምድቧ ዩጋንዳን ተከትላ ወደ ግማሽ ፍጻሜው አልፋለች።
በምድብ አንድ በተደረገው ጨዋታ ታንዛኒያ ሶማሊያን 2 ለ 1 ስታሸንፍ÷በዚሁ ምድብ ሁለቱ አገራት ቀድመው ለግማሽ ፍጻሜ ማለፋቸው ይታወቃል።
በምድብ ሁለት አስተናጋጅ ሀገር ኢትዮጵያ ሁለት ጨዋታ ተሸንፋ ወደ ቀጣዩ ዙር ማለፍ አልቻለችም።
በግማሽ ፍጻሜው ዩጋንዳ ከሶማሊያ፣ ደቡብ ሱዳን ከታንዛንያ ጥቅምት 2 ቀን 2015 ዓ.ም እንደሚካሄድ ኢዜአ ዘግቧል፡፡
የሴካፋ የእግር ኳስ ውድድር እስከ ጥቅምት 5 ቀን 2015 ዓ.ም ይቆያል።
በውድድሩ አንደኛ እና ሁለተኛ የሚወጡ ሀገራት በመጋቢት ወር 2015 ዓ.ም በአልጄሪያ አስተናጋጅነት ለሚካሄደው የአፍሪካ ከ17 ዓመት በታች የእግር ኳስ ውድድር ዞኑን ወክለው ይሳተፋሉ።