Fana: At a Speed of Life!

ከ290 ሺህ በላይ ሃሰተኛ የአሜሪካ ዶላር ይዞ የተገኘ ግለሰብ በቁጥጥር ስር ማዋሉን ፖሊስ ገለጸ

አዲስ አበባ፣ ጥቅምት 1፣ 2015 (ኤፍ ቢ ሲ) ከ290 ሺህ በላይ ሃሰተኛ የአሜሪካ ዶላር ይዞ የተገኘ ግለሰብ በቁጥጥር ስር ውሎ ምርመራ እየተካሄደ እንደሚገኝ የአዲስ አበባ ፖሊስ ገለጸ፡፡

በቁጥጥር ስር የዋለው ተጠርጣሪ ካሜሮናዊ ዜግነት ያለው ነው ተብሏል፡፡

ተጠርጣሪው የውሸት ምክንያት በመፍጠር አንድን ግለሰብ መንገድ ላይ ከተዋወቀ በኋላ ወደፊት በስፋት ተገናኝቶ ለማውራት እና አብሮ ለመስራት እንደሚፈልግ በመግለፅ ከግለሰቡ ጋር የስልክ አድራሻ ተለዋውጠው እንደተለያዩ ፖሊስ ጠቅሷል፡፡

የአዲስ አበባ ፖሊስ እንደገለፀው፥ ተጠርጣው ለማታለያ ዘዴ የሚጠቀምበትን የፈጠራ ወሬ በማዘጋጀት ወላጅ አባቱ የተባበሩት መንግስታት ድርጅት ውስጥ ይሰሩ እንደነበር፣ ለዕርዳታ የሚውል 5 ሚሊየን ዶላር እንዳሰባሰቡ እና በዚህ መሃል ግን ገንዘቡ ለተፈለገው አገልግሎት ሳይውል በሞት እንደተለዩት ለግለሰቡ ተናግሯል፡፡

ከተሰበሰበው ዶላር ውስጥም 2 ሚሊየን ዶላሩን በዲፕሎማቶች አማካይነት ወደ ኢትዮጵያ አስመጥቶ በኢንቨስትመንት ስራ ላይ መሰማራት እንደሚፈልግ ለግለሰቡ መግለጹን ፖሊስ ጠቅሷል፡፡

በኢንቨስትመንት ስራው ላይ አብሮ መሳተፍ የሚፈልግ ከሆነ 1 ሚሊየን 480 ሺህ ብር እንዲያዋጣ በተጠርጣሪው ጥያቄ የቀረበለት ይኸው ግለሰብ ሁኔታውን በመጠራጠር ለፀጥታ አካላት ጥቆማ እንደሰጠ ተገልጿል፡፡

ተጠርጣሪው በተደረገበት ክትትል መስከረም 30 ቀን 2015 ዓ.ም በለሚ ኩራ ክፍለ ከተማ ወረዳ 10 ልዩ ቦታው አያት አደባባይ ጣዕም ዳቦ ቤት ተብሎ በሚጠራው አካባቢ በፖሊስ ቁጥጥር ስር ማዋሉን ፖሊስ አሳውቋል፡፡

በወቅቱም በግለሰቡ ላይ በተደረገ ፍተሻ 297 ሺህ 700 ሃሰተኛ የአሜሪካ ዶላር፣ 3 ሺህ 600 ሃሰተኛ ብር እንዲሁም ሀሰተኛ ገንዘብ ለማዘጋጀት የሚጠቀምበት ማሽን እና ሌሎች ኬሚካሎች እጅ ከፍንጅ እንደተያዙ ፖሊስ ገልጿል፡፡

በተጠርጣሪው ላይ ምርመራ እየተካሄደ እንደሚገኝም ከአዲስ አበባ ፖሊስ ያገኘነው መረጃ ያመላክታል፡፡

ወንጀሎችን ለመከላከል ህብረተሰቡ ተገቢውን ጥንቃቄ ሊያደርግ እንደሚገባ ያሳሰበው ፖሊስ÷ ጥቆማ የመስጠት ልምዱንም አጠናክሮ እንዲቀጥል መልዕክት አስተላልፏል።

 

 

You might also like

Leave A Reply

Your email address will not be published.